Prezidentning 2025-yil 27-dekabrdagi qarori (PQ-391-son) bilan, O‘zbekiston temir yo‘llari 200 ta yo‘lovchi vagonini yangilash uchun $143 mln miqdorida kredit oladi.
Shavkat Mirziyoyev O‘zbekiston Tiklanish va taraqqiyot jamg‘armasiga 2026−2027-yillarda O‘zbekiston temir yo‘llari‘ga va uning tarkibidagi korxonalarning kafilligi asosida 200 ta yo‘lovchi vagonini yangilash uchun $143 mln miqdorida kredit ajratishni topshirdi. Kredit yillik 5% stavkada 10 yil muddatga, shu jumladan uch yillik imtiyozli davr bilan beriladi.
Hujjatga ko‘ra, 2026-yildan 2030-yilgacha O‘ztemiryo‘lyo‘lovchi — O‘zbekiston temir yo‘llari‘ning sho‘ba korxonasi 200 ta yangi yo‘lovchi vagoniga ega bo‘ladi.
O‘tgan yilning noyabr oyida O‘zbekistonning kelgusi besh yil ichida yo‘lovchi tashishni kengaytirish uchun 250 ta yo‘lovchi vagoni ishlab chiqarishni rejalashtirayotgani ma‘lum bo‘lgan edi.
O‘zbekiston temir yo‘llari boshqaruvi raisi Zufar Narzullayev o‘shanda prezident yo‘lovchi vagonlari ishlab chiqarishni sezilarli darajada ko‘paytirish bo‘yicha ko‘rsatma berganini ma‘lum qilgandi.
“Hurmatli prezidentimiz jamg‘arma (Tiklanish va taraqqiyot jamg‘armasi — tahr.) mablag‘lari hisobidan moliyaviy qo‘llab-quvvatlash orqali bizga har yili 40 emas, balki 50 ta yo‘lovchi vagonini ishlab chiqarishni ta‘minlashni topshirdi”, — degan edi u.
O‘tgan yilning iyul oyida Iqtisodiyot va moliya vazirligi O‘zbekiston temir yo‘llarining Toshkent yo‘lovchi vagonlarini qurish va ta‘mirlash zavodidagi ulushi temir yo‘llar va metropoliten uchun harakatlanuvchi tarkib ishlab chiqarish loyihasini amalga oshirish maqsadida “Rossiya kompaniyalari” tomonidan tashkil etilgan Transport Engineering Center ishonchli boshqaruviga o‘tkazilgani haqida xabar bergandi. Zavodning kuzatuv kengashi tarkibiga Rossiyaning Transmashxolding kompaniyasi yuqori boshqaruv xodimlari kiradi.
Avvalroq 2030-yilgacha Farg‘ona vodiysi va Surxondaryoga tezyurar elektropoyezdlar qatnovi yo‘lga qo‘yilishi haqida xabar berilgandi.
