Dr. Reddy‘s Laboratories Ltd kompaniyasi tomonidan Telsartan H dori vositasining ayrim seriyasi muomaladan qaytarib olinmoqda. Bu haqda Farmatsevtika mahsulotlari xavfsizligi markazi xabar berdi.
Ishlab chiqaruvchi tomonidan o‘tkazilgan sifat nazorati va barqarorlik sinovlari natijalariga ko‘ra, Telsartan H 80 mg/12,5 mg dori vositasining C2501976 seriyasida faol modda — gidroxlorotiazid miqdorining belgilangan me‘yorlardan chetga chiqqanligi aniqlangan.
Mazkur holat dori vositasining sifat ko‘rsatkichlariga oid nomuvofiqlik sifatida baholangan.
Taʼkidlanishicha, O‘zbekistonda muomalaga kiritilgan C2501977 seriyasi bo‘yicha faol modda miqdoriga oid bunday nomuvofiqlik qayd etilmagan.
Biroq ushbu seriya, nomuvofiqlik aniqlangan seriya bilan bir xil ishlab chiqarish lotiga mansub bo‘lgan faol moddadan ishlab chiqarilganligi sababli bozordan qaytarib olinmoqda.
Bunda dori vositalari muomalasi xavfsizligini ta‘minlash hamda ehtimoliy xavflarning oldini olish maqsad qilingan.
Shu munosabat bilan, ushbu seriyadagi Telsartan H 80 mg / 12,5 mg preparatini sotib olgan fuqarolardan ushbu dori vositasini iste‘mol qilmaslik so‘ralmoqda. Agar u avvaldan mavjud bo‘lsa, undan foydalanmaslik, shuningdek, zarurat tug‘ilganda davolovchi shifokor bilan maslahatlashgan holda muqobil dori vositasini tanlash aytildi.
Avvalroq elektron retsept birinchi bosqichda antibiotik va gormonal dorilar uchun majburiy bo‘lishi aytilgandi.
