Apple sentabr oyida o‘zining ilk buklanuvchan smartfonini taqdim etishni rejalashtirmoqda. Bu haqida The Korea JoongAng Daily nashri yetkazib berish zanjirida bo‘lgan manbalarga asoslanib xulosa chiqardi.
Avvalroq Bloomberg jurnalisti Mark Gurman ham kompaniya 2026-yilning ikkinchi yarmida buklanadigan qurilmalar bozorida debyut qilishga tayyorlanayotgani haqida xabar bergan edi.
Manbalarga ko‘ra, buklanadigan iPhone uchun egiluvchan OLED-panellarni ishlab chiqarish may oyida boshlanadi. Ularning yetkazib beruvchisi Samsung Display bo‘ladi, birinchi partiyaga esa 9 mlnga yaqin displey kiradi.
Shu bilan birga, nashr suhbatdoshlarining aniqlik kiritishicha, sentabr oyi hozircha asosiy sana bo‘lib qolmoqda, ammo muddatlar hali ham ko‘chirilishi mumkin.
Ta’kidlanishicha, buklanuvchan smartfon to‘rtta kamera bilan jihozlanadi: orqa panelda ikkita, old tomonda bitta va “ichki” tomonda yana bitta kamera o‘rnatiladi.
Kelgusi yangi qurilmaning dizayni va o‘lchamlari buklanuvchan kitobni eslatadi. Korpus ranglari: hozircha faqat oq va qora. Buklanuvchan iPhone o‘zining Apple C2 uyali modemiga ega bo‘ladi. SIM-karta uchun joy bo‘lmaydi.
Shuningdek, qurilma Face ID sensori bilan emas, Touch ID bilan jihozlanadi. In Cell ekran texnologiyasi buklanuvchan iPhone’ning buklangan qismini iloji boricha kamroq sezilishiga yordam beradi.
Avvalroq iPhone 18 Pro ekran ostida Face ID funksiyasi paydo bo‘lishi mumkinligi haqida xabar berilgandi.
Buning uchun kompaniya TrueDepth sensorlaridagi infraqizil nurlar o‘tishini yaxshilash uchun mikro-teshikli maxsus shishadan foydalanmoqda.
