Toshkent-AERO ixtisoslashtirilgan bojxona kompleksi tezkor tuzilmalari 179 dona uyali telefonning noqonuniy savdosiga chek qo‘ydi. Bu haqda bojxona kompleksi matbuot xizmati xabar berdi.
Kontrabandaga qarshi kurashish sho‘basi xodimlari Chilonzor tumanida bojxona rasmiylashtiruvidan o‘tmagan 102 dona iPhone qurilmasini “shartli xaridor"ga sotilayotgan vaqtida ushlab qoldi.
Ushbu telefonlarning umumiy qiymati 255 mln so‘mni tashkil etadi.
Shayxontohur tumani yaqinidagi savdo majmuasi atrofida yana 77 dona telefon noqonuniy aylanmadan chiqarildi. Ularning qiymati 207,9 mln so‘mga baholanmoqda.
Bojxona organlari mazkur holatlar yuzasidan surishtiruv olib bormoqda.
Maʼlum qilinishicha, yil boshidan buyon kompleks tomonidan 35 ta holatda jami 1,7 mlrd so‘mlik 377 ta uyali aloqa vositalarining noqonuniy aylanmasi oldi olingan.
Oktabr oyidan boshlab Bojxona qo‘mitasi yo‘lovchi bojxona deklaratsiyalarini to‘ldirish uchun mobil ilovani ishga tushirdi. Yo‘lovchi deklaratsiyasi ilovasida ariza beruvchining ma’lumotlari OneID orqali avtorizatsiyadan so‘ng avtomatik ravishda ko‘rsatiladi.
Ariza beruvchi chegaradan o‘tish turini (kirish yoki chiqish) tanlashi va o‘zi bilan birga bo‘lgan valyuta boyliklari va tovarlarni ko‘rsatishi kerak. Alohida funksiya mobil telefonni import qilishda e’lon qilish imkonini beradi. Shuningdek, bojxona aeroportlarda deklaratsiyalarni to‘ldirish uchun maxsus infokiosklar o‘rnatishga va’da berdi.
Aprel oyida Vazirlar Mahkamasi jismoniy shaxslar tomonidan O‘zbekistonga tovarlarni bojsiz olib kirishning yangi normalarini tasdiqladi. Unga ko‘ra, 1-maydan boshlab xalqaro kuryerlik jo‘natmalarida oyiga $200 lik (ilgari bir chorakda $1000) tovarlarni boj to‘lamasdan qabul qilishga ruxsat beriladi. Pochta jo‘natmalari uchun me’yor o‘zgarishsiz qoldi — $100.
Yuksalish harakati bojlarning bozor raqobatiga salbiy ta’sirini, shuningdek, fuqarolarning tovarlarni sotib olish xarajatlarining oshishini ta’kidladi.
Ekspertlar import bojlarining pastroq, mutanosib va progressiv stavkalarini joriy etishga, shuningdek, tijorat importi va shaxsiy ehtiyojlar uchun olib kirish o‘rtasidagi chegaralarni belgilashga chaqirdi.
2025-yilning noyabrida Toshkent aeroportida 95 dona kontrabanda iPhone 17 qo‘lga olingandi.
Avvalroq O‘zbekistonda 200 ga yaqin tovarlar uchun import bojlarini pasaytirish rejalashtirilayotgani haqida xabar berilgandi.
