OpenAI ChatGPT uchun yangilanish chiqardi va GPT-5.3 Instant sun’iy intellekt yordamchisini chiqardi. Bu haqda kompaniya saytida ma’lum qildi.
Bu yangilanish chat-botning foydalanuvchilar bilan yanada tabiiyroq muloqot qilishiga yordam beradi.
GPT-5.3 Instant aniq javoblar beradi hamda internetdan yanada sifatli va to‘g‘ri ma’lumotlarni to‘playdi. Yangi yangilanish tufayli “kundalik suhbatlar yanada izchil foydali va tabiiyroq bo‘ladi”.
Dasturchilar suhbatning boshi berk ko‘chaga kirib qolish holatlarini minimallashtirishga, muloqot maromiga xalal berishi mumkin bo‘lgan ortiqcha izohlar va botning keskin iboralarini kamaytirishga harakat qilishgan.
Bundan tashqari, taqdim etilgan model “ifodali, obrazli va jozibali nasr” yozishni yaxshiroq uddalaydi.
GPT-5.3 Instant yaratuvchilari “oldinda hali ish ko‘pligini” — masalan, bot nutqining ingliz tilidan boshqa tillardagi tabiiyligini oshirish yoki uning doimiy ravishda jonli nutqqa yaqinlashib borayotgan javob ohangini yaxshilash zarurligini tan olishdi.
GPT-5.3 Instant hozirdanoq barcha foydalanuvchilar, shuningdek, dasturchilar uchun APIda “gpt-5.3-chat-latest” nomi bilan mavjud. Tez orada Thinking va Pro uchun ham yangilanishlar chiqadi.
GPT-5.2 Instant modeli Legacy Models ro‘yxatida pullik obunachilar uchun yana uch oy mavjud bo‘ladi, shundan so‘ng, 3-iyun kuni foydalanishdan chiqariladi.
Avvalroq OpenAI birinchi SI qurilmasini ishlab chiqarishni 2027-yilga ko‘chirgani haqida xabar berilgandi.
Kompaniya bu qanday mahsulot bo‘lishi haqida hech narsa aytmagan. Ayrim OAV va insayderlar u kolonka yoki quloqchin bo‘lishi mumkinligini taxmin qilmoqda.
