Oliy Majlis Qonunchilik palatasi 7-aprel kuni yong‘in xavfsizligi tizimini takomillashtirish to‘g‘risidagi qonun loyihasini ikkinchi va uchinchi o‘qishda qabul qildi. Bu haqda parlament quyi palatasi matbuot xizmati xabar berdi.
Hujjat fevral oyi oxirida Zaxira palatasida birinchi o‘qishda ko‘rib chiqildi. Unga ko‘ra, “Yong‘in xavfsizligi to‘g‘risida"gi qonun, Ma’muriy javobgarlik to‘g‘risidagi kodeks, Jinoyat va Jinoyat-protsessual kodekslariga o‘zgartish va qo‘shimchalar kiritilmoqda.
Deputatlarning ta’kidlashicha, amaldagi qonunchilikda yong‘in xavfsizligi sohasidagi kompleks huquqiy, tashkiliy va profilaktika mexanizmlari to‘liq ishlab chiqilmagan. Shuningdek, bu bilan bog‘liq bir qator qoidabuzarliklar uchun javobgarlik belgilanmagan.
Yangi qonun loyihasi yonuvchi qurilish materiallaridan foydalanishni taqiqlaydi va binolarning toifasiga qarab qurilishga qo‘yiladigan texnik talablarni nazarda tutadi.
Shuningdek, loyiha, qurilish va pudrat tashkilotlari, boshqaruv kompaniyalarining yong‘in muhofazasi sohasidagi huquq va majburiyatlari belgilanmoqda.
Bundan tashqari, hujjatda obyektlarning yong‘in xavfsizligi talablariga muvofiqligi yuzasidan audit o‘tkazish tartibi belgilangan.
Yong‘in xavfsizligi sohasida mansabdor shaxslarning shaxsiy hisobdorligi va mas’uliyati kuchaytiriladi. Yong‘inlar natijasida yetkazilgan zararni qoplash bilan bir qatorda aybdor shaxsdan kompensatsiya undirish instituti (tort law) joriy etiladi.
Bozorlar, savdo va savdo-ko‘ngilochar majmualar mulkdorlari obyektlarni yong‘indan sug‘urta qilishlari, shuningdek, yong‘in sodir bo‘lganda odamlarning hayoti va sog‘lig‘iga yetkazilgan zarar uchun fuqarolik javobgarligi sug‘urtasini rasmiylashtirishlari shart.
Majburiy sug‘urta to‘g‘risidagi norma qonun loyihasiga ikkinchi o‘qishdan oldin kiritildi. Shuningdek, mualliflar hujjatdan “aholi manfaatlariga” zid bo‘lgan bir nechta normalarni olib tashladi va mahalliy hokimliklar hamda xalq deputatlari Kengashlarining yong‘in xavfsizligi sohasidagi vakolatlariga aniqlik kiritdi.
Hozirda qonun loyihasi Senat tomonidan ma’qullanishini kutmoqda. Shundan so‘ng uni prezident imzolashi kerak bo‘ladi.
2025-yilning oktabrida o‘tkazilgan taqdimotda prezident “Yong‘in xavfsizligi to‘g‘risida"gi qonun bugungi kun talablariga javob bermasligini ta’kidlagandi. Shu bois xavf-xatarlarni oldindan baholab, imkon qadar tez va samarali harakat qiladigan proaktiv tizim yaratish vazifasi qo‘yilgan.
