Olmazorda keyingi 3 yilda 400 million dollarlik investitsiyalar jalb etiladi. Bu haqda O‘zA xabar berdi.
Xabarga ko‘ra, keyingi 3 yilda tumanda jami 400 million dollarlik investitsiyalarni jalb qilish rejalashtirilgan. Bu borada tuman hokimiyatida tadbirkorlar bilan muzokaralar o‘tkazilib, joriy yilda jami 97 million dollar investitsiyalar jalb qilish bo‘yicha tashabbuskorlar bilan investitsion loyihalar amalga oshirilmoqda.
Tumandagi 55 mahallada mulkchilik shaklidan qat’iy nazar, bo‘sh turgan obyektlar, faoliyati to‘xtagan korxonalar, to‘liq foydalanilmayotgan ishlab chiqarish va yer maydonlari xatlovdan o‘tkazildi. 447 ana shunday ob’ekt aniqlanib, ulardan samarali foydalanish choralari ko‘rildi.
Tuman hokimining aytishicha, joriy yilning 3 iyunidan 10 avgustigacha to‘rt sektor rahbari o‘z hududida yillar davomida yechimini kutayotgan muammolarni aniqlab, bartaraf etish choralarini ko‘rgan. O‘rganishlar davomida tumanda 1 ming 256 fuqaroning muammolari aniqlandi. Ularning aksariyatini uy-joy masalasi tashkil qiladi.
“Xalq farovonligini oshirishning bosh omili sifatida tuman aholisining bandligini ta’minlashga alohida e’tibor qaratilmoqda. Shu maqsadda joriy yilda 15 mingta yangi ish o‘rni yaratish bo‘yicha Bandlik va mehnat munosabatlari vazirligi bilan birgalikda ishlab chiqilgan aniq chora-tadbirlar dasturi amalga oshirilmoqda”, deyiladi xabarda.
Yangi ish o‘rinlari asosan sanoat, xizmat ko‘rsatish sohasida investitsiya loyihalarini amalga oshirish, ko‘p qavatli turar joylar va yo‘l-muhandislik infratuzilmasini qurish, kichik biznes va tadbirkorlikni rivojlantirish bilan bog‘liq.
Ta’kidlanishicha, mahallalarda namuna tariqasida ixcham to‘ylarni o‘tkazish uchun mahalliy byudjet va mahalla jamg‘armasi hisobidan 1 milliard so‘m mablag‘ ajratilib, bugungi kunga qadar 15 mahallada ixcham to‘ylar tashkil etilib, ommaviy axborot vositalarida yoritildi.
