Uzbekistan Airways 2026-yilda ikkita yangi tor fyuzelyajli Airbus A321neo samolyotini oladi. Bu haqda milliy aviatashuvchi matbuot xizmati Spot’ga xabar berdi. Havo kemalari China Aircraft Leasing Group Holdings Limited (CALC) kompaniyasidan lizingga olinadi.
Kelayotgan laynerlarning joylashuvi Full Flat konfiguratsiyali 16 ta biznes-klass o‘rindiqlarini va 156 ta ekonom-klass o‘rindiqlarini o‘z ichiga oladi. Samolyotlar Airbus kompaniyasining yaxshilangan shovqin izolyatsiyasi, keng bagaj bo‘limi, o‘rindiqlar ustidagi qo‘shimcha joy va LED yoritgichiga ega Airspace Premium kabina saloni bilan jihozlanadi.
Bundan tashqari, bortda internetga ulanish imkoniyati bo‘ladi. Shuningdek, individual ekranlardan foydalanish mumkin bo‘lgan ko‘ngilochar tizim, jumladan, filmlar, musiqa, o‘yinlar va parvoz xaritasi mavjud bo‘ladi.
Aviakompaniyaning ta’kidlashicha, Airbus A321neo modeli o‘z klassidagi eng zamonaviy samolyotlardan biri hisoblanadi. Afzalliklari qatorida yuqori yoqilg‘i samaradorligi, uzoq parvoz masofasi va shovqin darajasining pastligi bor. Bu esa samolyotlarni o‘rta va uzoq masofali yo‘nalishlar uchun maqbul qiladi.
Bundan tashqari, Uzbekistan Airways 14 ta Boeing 787−8 Dreamliner samolyotlarini sotib olishni rejalashtirmoqda. Ularning dastlabki qiymati $2 mlrdga baholangan. Joriy yilda aviakompaniya Boeing bilan 2029−2032-yillarda samolyotlar yetkazib berish bo‘yicha memorandum imzolashni ko‘zda tutgan.
2028-yildan 2030-yilgacha prezidentning Fransiyaga tashrifi chog‘ida shartnoma asosida buyurtma qilingan 14 ta Airbus samolyoti ham kelishi kutilmoqda. Uzbekistan Airways o‘z mablag‘lari hisobidan shartnoma to‘lovlarini amalga oshirishni boshladi.
Avvalroq Centrum Air xususiy aviakompaniyasi yangi Airbus A320neo samolyotini qabul qilgani haqida xabar berilgandi.
