2026-yilda Toshkentdan Samarqand va Andijonga pulli yo‘llar qurilishi boshlanadi. Bu haqda Iqtisodiyot va moliya vazirligining 2026−2028 yillarga mo‘ljallangan moliyaviy strategiyasida aytiladi.
Kelgusi yilda Toshkent-Samarqand va Toshkent-Andijon yo‘nalishlarida pulli avtomobil yo‘llari qurish loyihalari amalga oshiriladi.
Shuningdek, Iqtisodiyot va moliya vazirligi xalqaro moliya institutlari mablag‘lari hisobidan yirik avtomagistrallarni ta’mirlash va qurish, shuningdek, ilg‘or tajribani hisobga olgan holda mavjud yo‘llarning o‘tkazuvchanlik qobiliyati va xavfsizligini oshirish niyatida.
Iyul oyida transport vaziri Ilhom Mahkamov Oliy Majlis Qonunchilik palatasidagi “Hukumat soati"da joriy yilda Toshkent-Andijon pulli avtomobil yo‘li loyihasining birinchi bosqichi doirasida tender savdolarini yakunlab, qurilish ishlarini boshlash rejalashtirilayotganini aytgandi.
Bundan tashqari, 2025-yilda Toshkent-Samarqand pullik yo‘lini qurish bo‘yicha salohiyatli kompaniyalar bilan shartnoma imzolanishi rejalashtirilgan.
Yanvar oyida Transport vazirligi Toshkent-Andijon pulli avtomobil yo‘lini qurish loyihasining birinchi bosqichini amalga oshirish bo‘yicha tender e’lon qilgan edi. Keyin hujjatlarni topshirishning oxirgi muddati (RFQ) ikki marta uzaytirildi va 21-iyunda tugadi.
Toshkent-Andijon pulli avtomobil yo‘li loyihasi 2019-yildan beri muhokama qilinmoqda. Buning uchun Qamchiqda yangi tonnel qurilishi rejalashtirilgan. DXShni rivojlantirish agentligi kelajak yo‘lidagi yo‘lkira narxini $5−6 deb baholagan. Yo‘lni 6 yil ichida uch bosqichda qurish rejalashtirilgan: Toshkent-Angren (78 km), Angren-Pop (93 km) va Pop-Andijon (143 km).
Jahon banki ishtirokida Toshkent-Andijon yo‘li loyihasi ishlab chiqildi. Yanvar oyida uning qurilishi bo‘yicha xalqaro tender e’lon qilindi. Qisqa vaqt ichida loyihaga “30 dan ortiq yetakchi xorijiy kompaniyalar” qiziqish bildirdi. Tezkor magistralning uzunligi 314 kilometrni tashkil etadi.
Uning ishga tushirilishi shaharlar o‘rtasidagi yo‘l vaqtini 5 soatdan 3 soatgacha qisqartirish, yalpi ichki mahsulotni 2,6% ga oshirish va yo‘l-transport hodisalarini 40 foizga kamaytirish imkonini beradi.
2024-yil avgust oyida prezident davlat-xususiy sheriklikni 2030-yilgacha rivojlantirish chora-tadbirlarini tasdiqlagan edi. DXShni rivojlantirish dasturiga ko‘ra, Toshkentdan Samarqand va Andijonga pulli yo‘llar qurish rejalashtirilgan. Obektlarning dastlabki qiymati mos ravishda $2,2 mlrd va $4,28 mlrdni tashkil etadi.
Avvalroq Spot Farg‘onada 20-oktabrgacha yo‘llarda og‘ir yuk mashinalari harakati cheklanishi haqida yozgandi.
Mahalliy biznes, favqulodda xizmatlar va uy-joy kommunal xo‘jaligi mahsulotlarini tashish bundan mustasno.
