Coca-Cola kompaniyasi Britaniyaning eng yirik qahvaxonalar tarmog‘i Costa Coffee’ni sotish masalasini banklar bilan muhokama qilmoqda. Bu haqda Sky News xabar berdi.
Tahlilchilarning fikricha, Coca-Cola tarmoqni sotishdan zarar ko‘rishi mumkin. Xaridorlardan takliflar kuz boshlaridayoq kelishi kutilmoqda.
Coca-Cola 2028-yilda Britaniyaning Costa Coffee qahvaxonalar tarmog‘ini an’anaviy shirin gazlangan ichimliklar ommabopligining pasayishi fonida yangi faoliyat yo‘nalishlarini izlash maqsadida $5,1 mlrdga sotib olgan.
Hozirda Buyuk Britaniyada 2 mingdan ortiq va dunyoning boshqa mamlakatlarida 3 mingdan ortiq qahvaxonalar tarmog‘i mavjud bo‘lib, unda 35 ming kishi ishlaydi.
Ehtimoliy sotuv sabablari ko‘rsatilmagan. Biroq moliyaviy hisobotlarga ko‘ra, hozirda Costa Coffee’ning yillik daromadi kompaniya amerikaliklar tomonidan sotib olingunga qadar bo‘lgan darajadan past.
Iyul oyida Coca-Cola kompaniyasining bosh direktori Jeyms Kuinsi daromadlar haqida ma’lumot berar ekan, Costa faoliyatidagi o‘zgarishlarga ishora qildi.
“Costa bizning umidlarimizni to‘liq oqlamadi va sarmoya kiritishda kutilgan ko‘rsatkichlarga erisha olmadi”, — degan edi Jeyms Kuinsi.
Hisob-kitoblarga ko‘ra, hozirda Costa Coffee’ni $2,7 mlrddan ortiq sotish mumkin emas, bu yetti yil oldin Coca-Cola tarmoq uchun to‘lagan summadan deyarli ikki baravar kam.
Sky News nashrining ta’kidlashicha, bu zarar hozirda bozor qiymati $304 mdan oshgan Coca-Cola uchun sezilarli bo‘lmasligi mumkin.
Joriy yil yanvarida Coca-Cola Europacific Partners Belgium xloratlar miqdori yuqoriligi sababli Belgiya, Buyuk Britaniya, Lyuksemburg, Niderlandiya, Fransiya va Germaniya bozorlaridan mahsulotlarni ommaviy ravishda qaytarib olishni boshlagani haqida xabar berilgandi.
2024-yil noyabr oyining oxiridan boshlab muomalaga kiritilgan banka va shishalardagi Coca-Cola, Sprite, Fanta, Fuze Tea, Minute Maid, Nalu, Royal Bliss va Tropico kabi brendlar chaqirib olindi.
Kompaniya ma’lumotlariga ko‘ra, muammo Gentdagi (Belgiya) zavodda mahsulot sifatini tekshirish jarayonida aniqlangan. Standartlarga mos kelmaydigan ichimliklarning aksariyati allaqachon muomaladan chiqarilgan yoki bozorga kiritilmagan, qolgan partiyalar esa tegishli mamlakatlar rasmiylari bilan birgalikda olib qo‘yiladi.
Iyulda esa AQShda Coca-Cola retsepti Trampning talabi bilan o‘zgarishi ma’lum qilindi. Qayd etilishicha, kompaniya ichimlik ishlab chiqarish jarayonida makkajo‘xori siropini qamish shakariga almashtirishga rozi bo‘lgan.
Costa Coffee qahvaxonalar tarmog‘i O‘zbekiston bozoriga kirishi haqida 2023-yil iyun oyida e’lon qildi.
Tarmoq “Telegram"da 19-iyun kuni kanal ochgan va yaqin orada ochilishi haqidagi birinchi postini e’lon qilgan. 26-iyun kuni kompaniya Instagram profilini ham ishga tushirdi.
Costa’ning tarixi 1971-yilda, aka-uka Bruno va Serjio Londonda birinchi qahvaxona ochgan paytdan boshlangan. 1978-yilda kompaniya kengayishni boshladi va uch yildan so’ng Britaniya poytaxtida Kosta brendi ostidagi birinchi qahvaxona ish boshladi.
