29-avgust kuni Shavkat Mirziyoyev Toshkent shahrining Yangi O‘zbekiston ko‘chasida barpo etilgan yerosti avtomobil yo‘lini ko‘zdan kechirdi. Bu haqda prezident matbuot xizmati xabar berdi.
Yo‘l infratuzilmasini rivojlantirish va transportlar harakatiga qulaylik yaratish aholi soni oshib, hududi kengayib borayotgan Toshkent uchun dolzarb masala ekani qayd etildi.
Yangi O‘zbekiston ko‘chasida istirohat bog‘i, uy-joylar, universitet va Olimpiya shaharchasi qurildi. Bu ko‘cha kelgusida Yangi Toshkent shahriga olib boruvchi asosiy yo‘llardan biri bo‘ladi.
Shu bois, ko‘cha bo‘ylab uzunligi 468, kengligi 25 metr bo‘lgan yerosti avtomobil yo‘li barpo etildi. U soatiga 10 mingdan ziyod avtomobilni o‘tkazish imkoniyatiga ega.
Tunnelning usti yashil hududga aylantirilib, Yangi O‘zbekiston bog‘i bilan Olimpiya shaharchasi o‘rtasida piyodalarning xavfsiz harakatlanishi ta’minlandi. Shuningdek, mazkur yo‘nalishda loyihalashtirilgan metro yo‘li uchun tunnel va bekat ham qurildi.
Ta’kidlanishicha, Yangi O‘zbekiston ko‘chasida barpo etilgan yerosti avtomobil yo‘li mashinalarning vaqt sarfini 2 barobarga qisqartirib, kuniga 1 tonna yonilg‘i iqtisod qilinishiga va atmosferaga chiqariladigan zararli gazlar miqdori 2 tonnaga kamayishiga sabab bo‘ladi.
Davlat rahbari yerosti avtomobil yo‘lining zamonaviy standartlar asosida tashkil etilganiga e’tibor qaratdi. Bu kabi ravon yo‘llar aholiga qulaylik yaratib, turizm rivojiga hissa qo‘shishi qayd etildi.
27-avgust kuni Shavkat Mirziyoyev ushbu yo‘l o‘tkazgich yaqinidagi Toshkent-Sharqiy aerodromi negizida barpo etilgan yangi aeroportni borib ko‘rgandi. Aeroportda VIP va CIP terminallar hamda 20 ta samolyotga mo‘ljallangan perron qurildi. Uning 4 kilometr uzunlikdagi uchish-qo‘nish yo‘lagi va 3 ta harakatlanish yo‘li og‘ir samolyotlarni ham qabul qila oladi.
Avvalroq Yashnobodning Ohangaron shoh ko‘chasida 4 ta yo‘l o‘tkazgich qurilishi haqida xabar berilgandi. Qurilish ishlari Toshkent halqa avtomobil yo‘lining 42−47 km qismida amalga oshirilmoqda.
