Toshkent metropoliteni ijtimoiy tarmoqlarda “Metroda kassa xodimlari yoppasiga ishdan bo‘shatiladi” sarlavhasi ostida tarqalgan xabarlar yuzasidan rasmiy bayonot berdi.
So‘nggi vaqtlarda yo‘lovchilar tomonidan bir martalik chiptalarga bo‘lgan talab keskin kamayishi natijasida ayrim bekatlarning bittadan vestibyullaridagi kassalar yopilib, uning o‘rniga avtomatlashtirilgan bankomatlar sinov tariqasida o‘rnatildi. Metroda to‘lovni amalga oshirish avtomatlashtirilgan tizimda olib boriladi.
Hozirda 23 ta bekatda naqd puldagi to‘lovlar uchun 24 ta infokiosk o‘rnatilgan. QR-kodli chiptalar narxi kassa va infokioskalarda 3 000 so‘mni tashkil etib, agar yo‘lovchi 5 ming, 10 ming yoki undan yuqori qiymatdagi kupyuralarni kiritsa, qolgan mablag‘ fuqaroning mobil raqamiga qaytim sifatida tushirib beriladi.
Joriy yil yakuniga qadar metropolitenning barcha bekatlariga 200 ta infokiosk o‘rnatilishi rejalashtirilgan.
Metropolitenda avtomatlashtirilgan tizim o‘rnatilishi sababli, qisqarishga tushgan xodimlar uchun belgilangan tartibda to‘rt oylik lavozim ish haqi miqdorida kompensatsiya va nafaqalar to‘lab beriladi. Bundan tashqari, ularni kelgusida ish bilan ta’minlash maqsadida buxgalteriya, tikuvchilik, qandolatchilik kabi yo‘nalishlardagi kurs xarajatlari qoplab beriladi.
Toshkent metropoliteni OAV vakillaridan asoslanmagan va yolg‘on ma’lumotlarni tarqatmaslikni so‘rab, buning uchun qonunchilikda javobgarlik mavjudligini eslatgan.
Iyul oyi boshida metroning 13 ta bekatidagi ayrim kassalar naqd puldagi to‘lovlar uchun yopildi. Ayrim metro bekatlaridagi vestibyullarda joylashgan kassalarda chiptalar xaridi keskin kamaygan. Ularning o‘rniga QR-chiptalarni sotib olish uchun maxsus terminallar o‘rnatiladi.
Kuni kecha, Toshkent metropoliteni yil yakuniga qadar avtomatlashtirilgan bankomatlar metroning barcha bekatlarida o‘rnatilishi, kassa operatori va katta operator lavozimlari to‘liq tugatilishini ma’lum qildi.
Avvalroq Yangi Toshkentning birinchi metro liniyasi qurilishi 2026-yil oxirigacha yakunlanishi haqida xabar berilgandi. Turkiya kompaniyasi tomonidan amalga oshirilayotgan loyiha qiymati $110 mlnni tashkil etib, uning doirasida 8 km uzunlikdagi 3 ta bekatdan iborat metro quriladi.
