Mustaqillik bayrami munosabati bilan Toshkent shahridagi yo‘l bo‘yi pulli avtoturargohlardan bepul foydalanish mumkin. Bu haqda Poytaxt Parking yagona avtoturargoh operatori ma’lum qildi.
Dam olish kunlari — 31-avgust va 1-sentabrda barcha pulli avtoturargohlar bepul bo‘ladi. Ta’kidlanishicha, avtoturargoh uchun hech qanday to‘lov va jarimalar qo‘llanilmaydi.
Shu bilan birga, 30-avgust hamda bayramdan keyingi kunlarda avtoturargohlardan foydalanish odatdagi tartibda — to‘lov asosida amalga oshiriladi.
Mustaqillik kuni munosabati bilan 5 kun ishlovchilar 30−31 avgust (shanba, yakshanba) hamda 1-sentabr (dushanba) kunlari, 6 kun ishlovchilar esa 31-avgust va 1-sentabr kunlari dam oladi.
Bandlik vazirligining qayd etishicha, qo‘shimcha dam olish kunlari belgilanmagan va dam olish kunlari ko‘chirilmagan.
Bundan tashqari, Bandlik vazirligi tomonidan e’lon qilingan 2025-yilga mo‘ljallangan ish vaqti me’yorlari davomiyligi taqvimida ham Mustaqillik bayramidagi dam olish kunlari sifatida 1-sentabr belgilangan.
Joriy yilning 8-may kuni Amir Temur xiyoboni, Mirobod, Shahrisabz, Istiqbol va Zarafshon kabi 6 ta sinov ko‘chasida yo‘l bo‘yi pulli avtoturargohlar loyihasi rasman ishga tushirildi. Ikkinchi bosqichda, 30-iyungacha poytaxtning yana 30 ta ko‘chasida pulli avtoturargohlar joriy etilishi, iyul oyi oxirigacha esa 13 208 ta to‘xtash joyiga mo‘ljallangan nuqtalar 86 ta ko‘chada ishga tushishi belgilangandi.
To‘lovlarni amalga oshirish imkonini beruvchi Poytaxt Parking mobil ilovasi ishga tushirildi. O‘zbek, rus va ingliz tillari mavjud bo‘lgan ilovada to‘xtash sessiyasining davomiyligini tanlash mumkin, shundan kelib chiqib narx hisoblanadi. To‘lovni Paynet, Octobank, Click, Payme va Uzum Bank ilovalari orqali amalga oshirish mumkin.
Toshkentda pulli avtoturargohlar
2024-yilning oktabrida poytaxt hokimi Shavkat Umurzoqov Toshkentda pulli to‘xtab turish joylarini tashkil etishga qaratilgan qarorni imzoladi. Unga ko‘ra, 2025-yilning avgust oyi oxirigacha 13,2 mingta pulli “parkovka” tashkil etish, kelgusida ularni 84 mingtaga yetkazish rejalashtirilgandi.
Bundan oldin hokimlik poytaxtda pulli to‘xtab turish joylarini tashkil etish tartibini tasdiqlangandi. Barcha tumanlarda ijaraga beriladigan maydonlarning umumiy hajmi 262,8 ming kv.metrni tashkil etadi. Operator Toshkentning barcha tumanlaridagi ko‘chalardagi nuqtalarni uch yil muddatga boshqarishga oladi va ularni texnik jihozlash uchun kamida $5 mln investitsiya kiritishi kerak bo‘ladi.
Noyabr oyi oxirida o‘tkazilgan birinchi auksionda Balcomuz qo‘shma korxonasi g‘olib bo‘lgandi. Kompaniya avtoturargohlar ijarasi uchun taxminan 120 mlrd so‘m taklif qilgan, ammo kelishuv tasdiqlanmagan.
Dekabr oyi o‘rtalariga kelib, Streetpark Systems poytaxt ko‘chalarida pulli “parkovka"larni tashkil etish huquqi uchun takroriy savdolarda g‘olib chiqdi. Ushbu kompaniya auksionning ikkinchi bosqichida “parkovka” maydonlarini 3 yilga ijaraga olish uchun 62,93 mlrd so‘m taklif etdi.
Shuningdek, ushbu kompaniya pulli “parkovka” platformasini yaratish bo‘yicha tenderda ham g‘olib bo‘lgan. Mart oyida Streetpark Systems mobil ilova yaratish ustida ish olib borayotgani ma’lum bo‘ldi.
2-may kuni Toshkentda yo‘l bo‘yidagi birinchi pulli avtoturargohlar sinovdan o‘tkazilayotgani ma’lum bo‘ldi. Ulardan biri Amir Temur xiyoboni atrofida joylashgan bo‘lib, bu yerda to‘xtash joyining narxi soatiga 12 ming so‘mni tashkil etadi.
Avvalroq Spot Toshkentning Yangi O‘zbekiston ko‘chasida yerosti avtomobil yo‘li ochilgani haqida yozgan edi.
