Fuqaro aviatsiyasi agentligi (O‘zaviatsiya) BAAning Etihad Airways aviakompaniyasiga O‘zbekistonga muntazam parvozlarni amalga oshirish uchun ruxsatnoma berdi.
Aviatashuvchi Abu-Dabi-Toshkent-Abu-Dabi yo‘nalishi bo‘yicha parvoz qilish huquqini qo‘lga kiritdi. Parvozlarda Airbus A320−232/251N va A321−231/251N/251NX samolyotlaridan foydalaniladi.
Iyul oyida Etihad Yevroosiyoning yettita shahriga havo qatnovi yo‘lga qo‘yilishini e’lon qildi. Kompaniya Toshkentdan tashqari Qozog‘istonning Olmaota, Gruziyaning Tbilisi, Armanistonning Yerevan, Ozarbayjonning Boku, Ruminiyaning Buxarest va Saudiya Arabistonining Madina shaharlariga parvozlarni yo‘lga qo‘yishni rejalashtirmoqda.
Etihad 2026-yil 17-martdan boshlab Abu-Dabi-Toshkent reyslarini yo‘lga qo‘yishni rejalashtirmoqda. Kompaniya shaharlar o‘rtasida haftasiga oltita reysni amalga oshiradi.
2022-yilning kuzida Etihad’ning sho‘ba aviatashuvchisi — Air Arabia Abu Dhabi O‘zbekiston va BAA poytaxtlari o‘rtasida muntazam qatnovlar yo‘lga qo‘yilishini e’lon qilgan edi. O‘shanda haftasiga ikkita reys — chorshanba va shanba kunlari amalga oshirilishi rejalashtirilgan edi.
Air Arabia Abu Dhabi’ga egalik qiluvchi Air Arabia loukosteri 2020-yilda O‘zaviatsiyadan O‘zbekistonga parvozlar uchun ruxsat oldi, shundan so‘ng Abu-Dabi-Toshkent reyslarini yo‘lga qo‘ydi. 2022-yilning kuzida kompaniya Turizm vazirligi (hozirgi Turizm qo‘mitasi) bilan mamlakatning boshqa shaharlariga parvozlarni tashkil etish imkoniyatlarini muhokama qildi.
O‘tgan hafta Vengriyaning Wizz Air arzon aviakompaniyasi 1-sentabrdan boshlab Abu-Dabidan, jumladan Toshkentga barcha parvozlarini to‘xtatishini e’lon qildi. Kompaniya veb-saytida ushbu sanadan keyingi chiptalarni band qilish imkonsiz, chunki hamma narsa “sotib bo‘lingan”, biroq kuzgacha chiptalar erkin sotuvda mavjud.
Reuters nashrining yozishicha, dushanba kuni kompaniya Yaqin Sharqqa keng ko‘lamli kengayish rejalardan voz kechdi. Bunga sabab sifatida so‘nggi paytlardagi geosiyosiy beqarorlikni ko‘rsatdi.
Mazkur beqarorlik havo hududlarining tez-tez yopilishi va ish jarayonidagi uzilishlarga olib keldi. Bu esa sayohatlarga bo‘lgan talabga salbiy ta’sir ko‘rsatdi va zarar ko‘rayotgan bo‘linmaning tiklanishiga umid yo‘qligini anglatadi.
Avvalroq Spot Silk Avia sentabr va oktabr oylaridagi bir qator yo‘nalishlardagi aviaqatnovlarini bekor qilgani haqida yozgandi.
Kompaniya texnik sabablarga ko‘ra Termiz, Namangan, Farg‘ona, Buxoro va Navoiyga aviaparvozlarni to‘xtatishga majbur bo‘lgan.
