Tim Kuk 2026-yil boshida Apple kompaniyasining bosh direktori lavozimini tark etishi mumkin.
Qayd etilishicha, bu kompaniya faoliyati natijalariga bog‘liq bo‘lmagan “rejalashtirilgan” qaror hisoblanadi.
Apple direktorlar kengashi va katta rahbarlari kompaniya bosh direktorini o‘zgartirishga tayyorgarlikni “faollashtirdi,” deb yozadi Financial Times manbalarga tayanib.
Eng ehtimoliy voris sifatida kompaniyaning apparat ta’minoti bo‘yicha vitse-prezidenti Jon Ternus ko‘rsatilmoqda.
Kukning ehtimoliy ketishi kompaniyaning joriy natijalari bilan bog‘liq bo‘lmagan “uzoq rejalashtirilgan” qadam bo‘lib, u yilni iPhone’ning “yuqori” sotuvlari bilan yakunlashi mumkin, deya ta’kidlaydi nashr.
FT ma’lumotlariga ko‘ra, o‘zgarishlar 2026-yil yanvar oyida “o‘ta muhim” bayram davrini qamrab olgan choraklik hisobot e’lon qilingandan so‘ng e’lon qilinishi mumkin.
Bu yangi rahbarlar jamoasiga kompaniyaning yillik yirik tadbirlari — iyun oyida ishlab chiquvchilar konferensiyasi va sentyabr oyida yangi iPhone taqdimotiga “asoslanish” uchun vaqt beradi.
Tim Kuk Apple’ga 2011-yilning yozida kompaniya asoschilaridan biri Stiv Jobs o‘rniga kelgandi. Bu vaqt ichida Apple’ning bozor kapitallashuvi $350 mlrddan $4 trlngacha o‘sdi.
2025-yil boshidan noyabr oyi o‘rtalariga qadar aksiyalar taxminan 12% ga qimmatlashdi, deya ta’kidlaydi FT. 14-noyabr kuni bo‘lib o‘tgan savdolarda ular donasi $272,4 dan yopildi.
Avvalroq Apple past talab tufayli keyingi iPhone Air modelining chiqishini kechiktirgani haqida xabar berilgandi.
2025-yilda flagman iPhone’ga nozik va yengil muqobil sifatida taqdim etilgan iPhone Air modeli kompaniyaning umidlarini oqlamadi.
