Avvalroq Spot Iqtisodiyot va moliya vazirligi 2026-yilgi budjetnomada soliq siyosatidagi bir qator o‘zgarishlarni e’lon qilgani haqida yozgandi.
Alkogol va tamaki mahsulotlari, shuningdek, neft mahsulotlariga aksiz solig‘i stavkalarini qayta ko‘rib chiqish taklif etilmoqda. Xususan, prezidentning 2024-yil iyundagi farmoni va Jahon savdo tashkiloti talablariga muvofiq, import tovarlar va mahalliy ishlab chiqaruvchilar uchun aksiz solig‘i birxillashtiriladi.
Alkogol va spirt
2026-yil 1-fevraldan boshlab alkogol (aroq, konyak va boshqalar) ning mahalliy mahsulotlari uchun etil spirtining bir litri 48 ming so‘m va import mahsulotlari uchun 60 ming so‘m miqdorida aksiz solig‘ini belgilash rejalashtirilmoqda. Import qilinadigan ichimliklar uchun amaldagi aksiz solig‘i 76 ming so‘mni, mahalliy ichimliklar uchun esa 44 ming so‘mni yoki 42% ga kamroqni tashkil etadi.
1-iyuldan o‘tkir alkogol ichimliklariga 48 ming so‘m miqdorida yagona stavka bo‘yicha aksiz solig‘i solinadi.
Vino va pivoga aksizlar ham xuddi shunday tarzda o‘zgaradi. Jumladan:
| Mahsulot | Aksiz solig‘i stavkasi, 1 litr uchun so‘m | |
| Import | Mahalliy | |
Tabiiy vino | ||
| amaldagi stavka | 14 000 | 5000 |
| 2026-yil 1-fevraldan | 12 000 | 7000 |
| 2026-yil 1-iyuldan | 10 000 | |
Boshqa vino | ||
| amaldagi stavka | 20 000 | 6000 |
| 2026-yil 1-fevraldan | 15 000 | 9000 |
| 2026-yil 1-iyuldan | 12 000 | |
Pivo | ||
| amalda | 6000 | 2000 |
| 2026-yil 1-fevraldan | 5000 | 3000 |
| 2026-yil 1-iyuldan | 3000 | |
Kelasi yil 1-yanvardan 1 litr iste’mol va texnik etil spirti uchun 15 ming so‘m aksiz solig‘i stavkasi saqlab qolinib, etil spirtining bosh fraksiyasiga aksiz solig‘ini 1 litr uchun amaldagi 15 ming so‘mdan 5 ming so‘mgacha pasaytiriladi.
Tamaki
Iqtisodiyot va moliya vazirligi 2026-yil 1-fevraldan boshlab sigara, chilim uchun tamaki, o‘rama tamaki, qizdiriladigan tamaki tayoqchasi va veyplar uchun aksiz solig‘ini 7% ga oshirishni taklif qilmoqda.
Shu bilan birga, kelasi yilning 1-iyulidan filtrli yoki filtrsiz sigaretlarga aksiz solig‘i ham 7% gacha oshiriladi.
Aksizlarning joriy va rejalashtirilgan stavkalarini quyidagi jadvalda taqqoslash mumkin:
| Mahsulot | Aksiz solig‘i stavkasi, so‘mda | |
| amalda | taklif etilmoqda | |
| Sigaretlar, 1000 donasi uchun | 340 000 | 365 000 |
| Sigara, 1 donasi uchun | 20 000 | 21 500 |
| Qizdiriladigan tamaki tayoqchasi, 1 kg uchun | 450 000 | 481 500 |
| Chilim uchun tamaki, chekiladigan o‘rama tamaki, 1 kg | 600 000 | 642 000 |
| Veyplar, 1 ml uchun | 2000 | 2140 |
Boshqa mahsulotlar
1-apreldan neft mahsulotlarini ishlab chiqarish va yakuniy iste’molchilarga sotishda aksiz solig‘ini 7% ga oshirish taklif etilmoqda.
Quyidagi jadvalda ushbu taklif asosida hisoblangan taxminiy raqamlar keltirilgan:
| Tovar (o‘lchov birligi) | Joriy stavka, so‘mda | 1-apreldan kutilayotgan stavka, so‘mda |
| Neft mahsulotlari: | ||
| AI-80 va undan yuqori benzin (1 tonna uchun) | 375 000 | ~401 250 |
| AI-91 va undan yuqori benzin (1 tonna uchun) | 335 000 | ~358 450 |
| aviakerosin, sintetik kerosindan tashqari (1 tonna uchun) | 300 000 | 321 000 |
| dizel yonilg‘isi (1 tonna uchun) | 360 000 | ~385 200 |
| Eco dizel yoqilg‘isi (1 tonna uchun) | 325 000 | ~347 750 |
| dizel va injektorli dvigatellar uchun motor moyi (1 tonna uchun) | 510 000 | ~545 700 |
| Yakuniy iste’molchiga realizatsiya qilinadigan tovar: | ||
| AI-80 va undan yuqori benzin (1 litr/ 1 tonna uchun) | 525 | ~561,75 |
| 700 000 | 749 000 | |
| AI-91 va undan yuqori benzin (1 litr/ 1 tonna uchun) | 470 | ~502,9 |
| 621 000 | 664 700 | |
| dizel yonilg‘i (1 litr/ 1 tonna uchun) | 525 | ~561,75 |
| 635 000 | 679 450 | |
| suyultirilgan gaz (1 litr/ 1 tonna uchun) | 476 | 525 |
| 1 000 000 | 1 070 000 | |
| siqilgan gaz (1 kub m uchun) | 750 | ~802,5 |
Polietilen granulalar va tabiiy gaz uchun stavkalar o‘zgarishsiz — mos ravishda 10% va 12% miqdorida qoladi.
Shuningdek, Iqtisodiyot va moliya vazirligi shirin ichimliklarga aksiz solig‘ining progressiv stavkasiga o‘tish (shakar miqdoriga qarab 500 so‘mdan 535 so‘mgacha) va energetik ichimliklar uchun aksiz solig‘ini 7,5% ga — 2150 so‘mgacha oshirishni taklif qildi. Bundan tashqari, kartoshka chipslarining bir kilogrammi uchun 15 ming so‘m miqdorida aksiz solig‘ini joriy etish ko‘zda tutilmoqda.
Avvalroq Spot O‘zbekistonda alkogol va tamaki mahsulotlari sohasida avtomatlashtirilgan xavf-tahlil tizimi ishga tushirilishi haqida yozgandi.
