Avvalroq Spot Iqtisodiyot va moliya vazirligi 2026-yilgi budjetnomada soliq siyosatidagi bir qator o‘zgarishlarni e’lon qilgani haqida yozgandi.
Kelgusi yil uchun mo‘ljallangan davlat budjeti loyihasiga ko‘ra, 2026-yil 1-yanvardan ko‘chmas mulk va avtotransport vositalarini ijaraga beruvchi jismoniy va yuridik shaxslar uchun ijara to‘lovining eng kam stavkalarini oshirish taklif etilmoqda.
Bunda mol-mulkni ijaraga beruvchi shaxslar uchun soliq solish maqsadida qo‘llaniladigan ijara to‘lovining minimal stavkalarini 7% ga indeksatsiya qilish rejalashtirilgan.
Eng kam soliq stavkalari quyida keltirilgan:
| Ijaraga beriladigan mol-mulk turi | Belgilangan stavka miqdorini tavsiflovchi ko‘rsatkich | Taklif etilayotgan oylik ijara to‘lovi stavkalarining eng kam miqdorlari, so‘mda | ||
| Toshkent | Nukus, viloyat markazlari | boshqa aholi punktlari | ||
| 1. Binolar: | ||||
| turar joy | Umumiy maydonning 1 km.metri uchun | 30 000 | 14 500 | 5 900 |
| noturar joy | 48 000 | 28 400 | 11 800 | |
| 2: Avtotransport | ||||
| yengil avtomobil (yo‘lovchilar, bagaj tashishga mo‘ljallangan hamda haydovchi o‘rnini hisoblamaganda, o‘rindiqlari soni 8tadan ko‘p bo‘lmagan avtomobillar) | 1 ta avtomobil uchun | 918 000 | ||
| mikroavtobuslar, avtobuslar va yuk avtomobillari | 1 824 000 | |||
Mazkur stavkalar jismoniy va yuridik shaxslarning mol-mulkini ijaraga berishdan olinadigan daromadlariga soliq solish maqsadida qo‘llaniladi.
Shu bilan birga, ular ko‘chmas mulkdan tekin foydalanish shartnomalariga tatbiq etiladi. Bundan yaqin qarindoshlar o‘rtasidagi tuzilgan shartnomalar mustasno.
2025-yilda mol-mulkni ijaraga beruvchi shaxslar uchun soliq solish maqsadida qo‘llaniladigan ijara to‘lovining minimal stavkalari 10−12% ga indeksatsiya qilingandi.
Avvalroq Spot O‘zbekistonda qishloq xo‘jaligi yerlarini qayta ijaraga berishga ruxsat berilishi haqida yozgandi. Yer egalari hamda foydalanuvchilari o‘z yer uchastkalariga bo‘lgan huquqlarini 2027-yilgacha ijara huquqiga o‘zgartirishlari mumkin bo‘ladi.
