Belgiyaning Allegro BIO kompaniyasi O‘zbekistonda biotexnologik mahsulotlar ishlab chiqarishni rejalashtirmoqda. Bu haqda Investitsiyalar, sanoat va savdo vazirligi xabar berdi.
Vazir o‘rinbosari Akram Aliyev kompaniya bosh direktori Lukas Dekyuiper bilan uchrashdi.
Muzokaralarda farmatsevtika va biotexnologiya sohalarida hamkorlikni kengaytirish istiqbollari, yuqori qo‘shilgan qiymatga ega innovatsion loyihalarni rivojlantirish muhokama qilindi.
Shuningdek, ishlab chiqarishni mahalliylashtirish hamda qo‘shma ilmiy-tadqiqot tashabbuslarini ilgari surish masalalari ham qayd etildi.
Kompaniyaning O‘zbekistonda biotexnologik mahsulotlar ishlab chiqarish, tadqiqot markazi (R&D) tashkil etish, mavjud R&D loyihalarini mamlakatga ko‘chirish rejalariga e‘tibor qaratildi.
O‘zbek tomoni investorlar uchun taqdim etilayotgan imtiyozlarni batafsil tushuntirib berdi. Shu bilan birga, farmatsevtika erkin iqtisodiy zonalarining imkoniyatlari va eksport bozorlariga chiqishning amaliy jihatlari aytib o‘tildi.
Tomonlar investitsiya tashabbuslarini ishlab chiqish hamda ilmiy-tadqiqot yo‘nalishlaridagi hamkorlikni kengaytirishga tayyorliklarini bildirdi.
2023-yilning oktabrida Xitoy texnoparki bilan Sirdaryoda biotexnologik mahsulotlar zshlab chiqarishga ixtisoslashgan texnopark tashkil etilishi aytilgandi. Bundan tashqari, Rossiya kompaniyasi Sirdaryoda qiymati $20 mlnlik biotexnologik majmua qurmoqchi ekanligi haqida xabar berilgandi.
Avvalroq Bryusselning Ahlers Logistics kompaniyasi O‘zbekistonda logistika markazlari barpo etishga qiziqish bildirayotgani haqida xabar berilgan edi.
