Raqobat qo‘mitasi Yangi yil bayramida yirik chakana savdo tarmoqlarini narxlar barqarorligini ta‘minlashga chaqirdi. Bu haqda qo‘mita matbuot xizmati xabar berdi.
Qo‘mita tomonidan keskin talab oshadigan ijtimoiy muhim oziq-ovqat mahsulotlari narxlarini barqaror ushlab turish uchun Korzinka, Makro, Havas, Baraka, Magnum, Assorti, b1 va Magnit savdo tarmoqlariga tegishli ko‘rsatmalar yuborildi.
Unga ko‘ra, riteylarga yetkazib beruvchilar tomonidan narxlarning o‘zgartirilishi, logistika xarajatlari va boshqa narxning oshishiga olib kelishi mumkin bo‘lgan omillar to‘g‘risida qo‘mitani tezkor xabardor qilib borishi kerak.
Shuningdek, ularga yetkazib beruvchilarni asossiz narx oshirish holatlariga yo‘l qo‘ymaslik bo‘yicha ogohlantirib borish vazifasi yuklatildi.
Raqobat qo‘mitasi yangi yil oldidan ayrim tadbirkorlar isteʼmolchilarni chalg‘ituvchi yolg‘on chegirmalar eʼlon qilayotganini maʼlum qilgandi. Qo‘mita aksiyalarga oid qonunchilikni buzgan tadbirkorlarga nisbatan moliyaviy jarimalar qo‘llanishi mumkinligini eslatdi.
Avvalroq Toshkent viloyatida Mama Znayet tovar belgisiga o‘xshash nomdan foydalangan korxona jarimaga tortilgandi.
