Toshkentda transport tizimini modernizatsiya qilish ishlari boshlanmoqda. Bu haqda Prezident administratsiyasi rahbari Saida Mirziyoyeva o‘zining Telegram-kanalida ma’lum qildi.
U davlat rahbarining poytaxtda transport tizimi boshqaruvini takomillashtirishga oid dekabr oyida qabul qilingan qarorini hayotga tatbiq etish ishlari boshlanganini qayd etdi.
Buning uchun maxsus tuzilgan Yo‘l harakatini tashkil etish markazi 26-fevral kuni Toshkentdagi tirbandliklar va ekologiya masalalarini hal qilish, shuningdek, jamoat transporti nazorati bo‘yicha taqdimot o‘tkazdi.
Berilgan hisobotlarga ko‘ra, “bugun-erta” “aqlli” svetoforlarni o‘rnatish, yo‘llarga standartlarga mos chiziqlar tortish hamda avtoturargohlarni to‘g‘ri tashkil qilish bo‘yicha keng ko‘lamli ishlar boshlanadi.
“Umid qilamanki, shahar hokimi boshchiligidagi jamoa qarorning ijrosini to‘laqonli ta’minlashga bor kuch va imkoniyatini qaratadi. Men buning bajarilishini shaxsan nazorat qilib boraman. Poytaxt uchun o‘ta muhim, juda zarur bo‘lgan ushbu loyihani amalga oshirishda jamoaga muvaffaqiyat tilayman”, — deb yozdi Prezident administratsiyasi rahbari.
Qaror bilan shaharda intellektual transport tizimi joriy etilib, videokuzatuv va sensorlar orqali transport hamda piyodalar oqimi tahlil qilinishi belgilangan. Shu asosda svetoforlar avtomatik boshqarilib, jamoat va maxsus transportga ustuvorlik beriladi.
Shuningdek, “Qulay muhit” va “Hokimiyat monitori” tizimlari ishga tushirilib, videokuzatuv orqali obodonlashtirish va chiqindilar bilan bog‘liq qonunbuzarliklar aniqlanadi.
2025-yilning 3-dekabr kuni prezident Toshkentda transport boshqaruvini takomillashtirish va tirbandliklarning oldini olish choralariga doir taqdimot bilan tanishgandi. Yig‘ilishda Toshkentda sinov tarzida yagona yo‘l harakati markazi ochilishi taʼkidlandi. Davlat rahbari pilot loyihani joriy yilning o‘zidayoq ishga tushirishni topshirgan edi.
Toshkent shahar hokimi Shavkat Umurzakov poytaxtda yo‘l infratuzilmasini boshqarishning yagona tizimi mavjud emasligi tirbandliklarning asosiy sabablaridan biri bo‘lib qolayotganini ta’kidladi. Yo‘l harakatini tashkil etish markazi natijasida tirbandlik 40% gacha kamayishi taʼkidlandi.
