Toyota 2022-yildan 2025-yilgacha ishlab chiqarilgan qariyb 443 mingta Tundra pikaplarini qayta chaqirishni e’lon qildi.
Qaytarib olishga avtomobillarning namlik tufayli orqa chiroqlarning ishdan chiqish ehtimoli sabab bo‘lgan.
Muammo ahamiyatsizday ko‘rinishi mumkin, lekin u, ayniqsa qorong‘u paytda, yo‘l-transport hodisalari xavfini keskin oshiradi.
Qayd etilishicha, orqaga yurish chog‘ida chiroqsiz qolgan haydovchi ko‘rish qobiliyatini yo‘qotadi, boshqa yo‘l harakati ishtirokchilari esa xavf haqidagi ogohlantirish signalini ilg‘ay olmaydilar.
AQSh Milliy yo‘l harakati xavfsizligi boshqarmasi (NHTSA) ma’lumotlariga ko‘ra, nosozlikning sababi chiroqlarni yig‘ishda ishlatilgan yelim bo‘lgan. Bu yelim namlikni o‘tkazib yuborishi mumkin, bu esa butun qurilmaning zanglashi va ishdan chiqishiga olib keladi.
Chaqiruv barcha modellarga, shu jumladan gibrid versiyalarga ham taalluqli. Mashinalarning bir qismi AQShdan tashqariga ham yetkazib berilgan.
Toyota allaqachon dilerlar va egalarga xabar berishni boshladi. Chiroqlarni almashtirish bepul amalga oshiriladi, bunda mutaxassislar elektr simlarini tekshirib, zararlangan qismlarni yangilaydilar. Nosozlikni o‘z kuchi bilan bartaraf etgan egalarga ta’mirlash xarajatlari qoplanadi.
2024-yil iyul oyida Toyota AQShda yon xavfsizlik yostiqchalari noto‘g‘ri ochilgani uchun 145 254ta avtomobilni chaqirib olishini e’lon qildi.
To‘qnashuv sodir bo‘lganda, yon havo yostig‘i yo‘lovchini avtomobildan chiqarib yuborishning oldini olishga yordam beradigan to‘siq hosil qiladi.
Biroq, AQSh Milliy yo‘l harakati xavfsizligi boshqarmasining ta’kidlashicha, ba’zi “Toyota” avtomobillarida haydovchining xavfsizlik yostig‘i mo‘ljallangan tarzda ochilmasligi va qisman ochiq oynadan tashqarida ochilishi mumkin.
Qaytarib olish Toyota Grand Highlander, Grand Highlander Hybrid, Lexus TX350, TX500 Hybrid va TX550 Hybrid+ kabi 2024-yilda ishlab chiqarilgan ba’zi yo‘ltanlamas va gibrid modellarni o‘z ichiga oladi.
Aprel oyida Toyota Yaponiyaning Tsutsumi zavodida ishlab chiqarilgan 135 305 dona “Prius” avtomobilini qaytarib olish tartibini joriy qilgandi.
Qayd etilishicha, avtomobillarning qaytarib olinishiga orqa eshik tutqichlaridagi nuqson sabab bo‘lgan.
Transport departamentiga ko‘ra, chaqirib olingan mashinalar 2022-yilning noyabridan 2024-yilning apreligacha ishlab chiqarilgan.
Ushbu muammodan kelib chiqib, kompaniya kamchiliklarni tuzatishga e’tibor qaratish va kelajakda shu kabi ishlab chiqarish xatolarining oldini olish maqsadida “Prius"ga buyurtmalarni vaqtincha to‘xtatdi.
2023-yil dekabr oyida Toyota xavfsizlik yostig‘i muammosi tufayli 1,12 mln avtomobilni qaytarib olishga qaror qilgani haqida xabar berilgandi.
Kompaniya 20-dekabr kuni bergan bayonotida aytishicha, sensordagi qisqa tutashuv xavfsizlik yostiqchalari mo‘ljallangandek ochilmasligiga olib kelishi mumkin.
Mashinalarni ortga qaytarish 2020-yildan 2022-yilgacha bo‘lgan avtomobillarni, jumladan Avalon, Camry, Corolla, RAV4, Lexus ES250, ES300H, ES350, RX350 Highlander va Sienna Hybrid modeldagi avtomobillarni o‘z ichiga oladi.
Ularda yo‘lovchilarni tasniflash tizimining (OCS) sensorlari ishlamay qolishi mumkin. Jarayon AQShda 1 mln avtomobilni qamrab oladi.
Avtomobil ishlab chiqaruvchi kompaniya fevral oyidan boshlab mashina egalarini qaytarib olish haqida xabardor qilishni rejalashtirmoqda.
2022-yil iyul oyida Toyota OCS sensori yo‘lovchini noto‘g‘ri aniqlashiga olib kelishi mumkin bo‘lgan ichki qismlar o‘rtasidagi potentsial o‘zaro ta’sirlar tufayli AQShdagi 3500ta RAV4 avtomobilini chaqirib olishini e’lon qilgandi.
AQSh Milliy Yo‘l harakati xavfsizligi boshqarmasi ma’lumotlariga ko‘ra, oldingi xavfsizlik yostiqchalari 30 yil ichida mamlakatda 50 mingdan ortiq odamning hayotini saqlab qolgan.
“Yangi datchiklar paydo bo‘lishining sababi, eski xavfsizlik yostiqchalar haydovchi va yo‘lovchilar uchun bir xil tarzda ochilib, ba’zi jarohatlar, kam hollarda bolalar, jussasi kichiklar va havo yostig‘iga juda yaqin bo‘lgan kamarsiz yo‘lovchilarning o‘limiga olib kelgan”, deyiladi xabarda.
