O‘zbekistonda dollarning rasmiy kursi pasayishda davom etmoqda. Bu haqda Markaziy bank matbuot xizmati xabar berdi.
Regulyator Amerika valyutasining rasmiy kursini 12 768,26 so‘m etib belgiladi. Kun davomida kurs 62 so‘m 87 tiyinga pasaydi.
Dollarning rasmiy kursi 2024-yil 10-oktabridan beri bunday eng past ko‘rsatkichni qayd etdi.
Bir kun oldin Amerika valyutasining rasmiy kursi 55 so‘m 77 tiyinga pasayib, 12 831,13 so‘mni tashkil qilgandi.
Avvalroq Spot aprel oyida O‘zbekistonda dollarning rasmiy kursi qanday o‘zgargani haqida yozgandi.
Dekabr oyida Spot tahlilchilar bilan 2024-yilda so‘mning qadrsizlanishi sabablari, milliy valyuta mustahkamlanishidagi risklar va 2025-yilda almashuv kursiga ta’sir qiluvchi omillar haqida suhbatlashdi.
Ekspertlar joriy yil yakuni bo‘yicha dollar kursi 13 340−14 ming so‘m oralig‘ida shakllanishini kutmoqda. Milliy valyuta oltinning sotilishi va o‘sishiga, jalb qilinadigan xorijiy kreditlar va investitsiyalarga, Markaziy bank siyosatiga, transchegaraviy o‘tkazmalar hajmiga, import oshishiga hamda global iqtisodiyot holatiga bevosita bog‘liq bo‘ladi.
2024-yilda so‘mning real samarali almashuv kursi (REER) 5,9% ga mustahkamlandi. Markaziy bank joriy yilning ikkinchi yarmida almashuv kursi o‘rta muddatli trend darajasiga qaytishini kutmoqda.
