UzAuto Motors yangi obligatsiyalar chiqarishni rejalashtirmoqda. Bu haqda avtomobil ishlab chiqaruvchisi bosh direktori Yanosh Kovach intervyuda ma’lum qildi.
Kompaniya ijrochi direktori Odiljon Bastamqulovning ta’kidlashicha, yaqinda ochilgan uchinchi presslash sexi ishlab chiqarish quvvatini 140 mingtaga — hozirgi 410 mingdan 550 mingtagacha oshiradi (2016-yilda — 88,2 ming). Bundan tashqari, bu qo‘shimcha 470 ta yangi ish o‘rni yaratish imkonini beradi.
Shuningdek, joriy yil boshida kompaniyaning Xorazm filialida ishlab chiqarishni 30 ming dona mashinaga oshirish uchun bo‘yash va payvandlash sexlari modernizatsiya qilindi.
UzAuto Motors bosh direktori Yanosh Kovach avtomobil ishlab chiqarish texnologiyalari Amerikaning General Motors ishlab chiqarish tizimlariga moslashtirilganini ta’kidladi.
Presslash sexida jarayonlarning qariyb 90%i avtomatlashtirilgan, kuzovni yig‘ishda esa robotlashtirish darajasi 60% ga yetadi. Biroq, mahsulot sifatini nazorat qilishda General Motors tizimlari faqat qisman qo‘llaniladi, ammo kompaniya ishlab chiqarish jarayonini takomillashtirishni davom ettirishga va’da bermoqda.
“Kompaniya faoliyati yevrobondlar hisobidan moliyalashtiriladi. Hozir biz yuqori qiymatli yangi obligatsiyalar chiqarish ustida ishlayapmiz”, — dedi Yanosh Kovach.
2021-yil aprel oyida UzAuto Motors $300 mlnlik birinchi xalqaro obligatsiyalarini muomalaga chiqardi. Investorlarning yevrobondlarga bo‘lgan talabi $1,4 mlrddan oshib ketdi, ular bo‘yicha daromadlilik esa 5,3% dan 4,8% gacha pasaydi.
Birinchi yarim yillikda UzAuto Motors kompaniyasining sof foydasi 27,5% ga kamayib, 1,91 trln so‘mdan 1,38 trln so‘mgacha tushdi. Avtomobil ishlab chiqaruvchining daromadi 9,49% ga qisqarib, 21,2 trln so‘mni, yalpi foydasi esa 22,8% ga kamayib, 3,43 trln so‘mni tashkil etdi. Taqsimlanmagan foyda 2 trln so‘mdan ko‘proqqa oshib, 11,2 trln so‘mdan oshib ketdi. Shu bilan birga, mahsulot tannarxi atigi 6,36% ga pasayib, 17,7 trln so‘mni tashkil etdi, xarajatlar esa taxminan o‘tgan yilgi darajada qolib, 2,33 trln so‘mni (-2,2%) tashkil etdi.
Avvalroq Spot UzAuto Motors 8 ta yangi model chiqarishni rejalashtirayotgani haqida yozgandi.
Kompaniya bosh direktori Yanosh Kovach hozirda ushbu modellar ishlab chiqilayotganini hamda yaqin orada taqdim etilishini ma’lum qildi.
