Sun’iy intellekt sohasidagi yetakchi kompaniyalar rahbarlari Time jurnali tomonidan “Yil insonlari” deb e’tirof etildi. Bu haqda 11-dekabr kuni ma’lum qilindi.
Jurnalistlarning ta’kidlashicha, nufuzli nominatsiyada “sun'iy intellekt yaratuvchilar” g‘alaba qozongan.
Mashhur “Osmono‘par binodagi tushlik” surati uslubidagi muqovada quyidagi shaxslar tasvirlangan:
- Meta rahbari Mark Sukerberg;
- AMD bosh direktori Liza Su;
- X kompaniyasi rahbari Ilon Mask;
- Nvidia rahbari Jensen Xuang;
- OpenAI rahbari Sem Altman;
- Google’ga tegishli DeepMind sun’iy intellekt kompaniyasi bosh direktori Demis Xassabis;
- Anthropic rahbari Dario Amodey;
- ImageNet asoschisi va “AIning cho‘qintirgan onasi” Fey-Fey Li.
Time nashrining ta’kidlashicha, AQSHning saylangan prezidenti Donald Trampning 2025-yildagi qasamyod marosimida Amerika texnologiya kompaniyalari rahbarlari, jumladan Mask, Altman va Sukerberg “ahamiyatli o‘rin” egallagan.
O‘sha kuni, 20-yanvar sanasida, Xitoyda DeepSeek nomli suhbatdosh dastur ishga tushirildi va u bir zumda butun dunyoda eng ko‘p muhokama qilinayotgan ishlanmalardan biriga aylandi.
Ertasi kuniyoq G‘arb sanoat yetakchilari dunyodagi eng yirik sun’iy intellekt loyihasini yaratish maqsadida “Yulduzli darvozalar” loyihasiga $500 mlrd mablag‘ sarflashga va’da berishdi.
2024-yilda Time jurnali Donald Trampni yil odami deb topgandi.
U yil odami sifatida ikkinchi marotaba e’tirof etildi. Bundan oldin, siyosatchi 2016-yilda AQSh prezidentlik saylovlaridagi birinchi g‘alabasidan keyin mazkur nomni olgandi.
