Tadbirkorlarga soliq pasportlari tuzilmoqda. Bu haqda Davlat soliq qo’mitasi matbuot xizmati xabar berdi.
Xabarga ko’ra, Davlat soliq qoʻmitasi tomonidan tajriba sinov tariqasida Mirzo Ulugʻbek tumani hududida joylashgan 54 ta mahallada faoliyat yuritayotgan tadbirkorlik subyektlarining pasportlarini tuzish, belgilangan joyida mavjudligi, haqiqatda shugʻullanayotgan faoliyat turini oʻrganish, hisobotdagi va amaldagi ishchilar sonini solishtirish, noqonuniy va hujjatsiz faoliyat yuritayotganlarni aniqlash va ularni davlat roʻyxatidan oʻtkazish tadbirlari oʻtkazilmoqda.
“Mirzo Ulugʻbek tumani davlat soliq inspeksiyasi tomonidan mazkur tadbirlarda ishtirok etish uchun Toshkent shahar moliya boʻlimi, tumanda joylashgan tijorat banklari hamda davlat soliq boshqarmasi va inspeksiya xodimlaridan iborat 17 ta ishchi guruhlari tashkil etilgan boʻlib, jami 170 nafar xodim ushbu faoliyatga jalb etilgan”, deyiladi xabarda.
Oʻtkazilgan oʻrganish maʼlumotlariga koʻra, tumanda jami 7891 ta xoʻjalik yurituvchi subyektlar roʻyxatdan oʻtgan boʻlib, shundan 6167 tasi yuridik shaxs va 1724 tasi yakka tartibdagi tadbirkorlarni tashkil etadi.
Ishchi guruh aʼzolari tomonidan 19 avgust holatiga jami 6083 ta tadbirkorlik subyektlarining pasportlari tuzilib, maʼlumotlar bazasi shakllantirilgan.
Shundan, faoliyat turlari boʻyicha — chakana savdo faoliyati bilan shugʻullanayotganlar 1172 tani, umumiy ovqatlanish faoliyati bilan shugʻullanayotganlar 342 tani, ishlab chiqarish faoliyati bilan shugʻullanayotganlar 576 tani, qurilish faoliyati bilan shugʻullanayotganlar 238 tani, xizmat koʻrsatish faoliyati bilan shugʻullanayotganlar 2554 tani va yakka tartibdagi tadbirkorlar 1 035 nafarni tashkil etadi.
Shu bilan birga, savdo, ishlab chiqarish, qurilish hamda xizmat koʻrsatish korxonalarini pasportlashtirish jarayonida 1070nafar fuqaroning norasmiy ravishda ishlayotganligi hamda 277 nafar yakka tartibdagi tadbirkorlar tasarrufida 507nafar fuqaroning tegishli hujjatsiz yollangan asosda mehnat qilayotganligi aniqlangan.
