Toshkent-Andijon pulli avtomobil yo‘lini qurish loyihasi bo‘yicha tenderda uchta kompaniya ishtirok etadi. Bu haqda 19-noyabr kuni davlat-xususiy sheriklik bo‘yicha uchinchi davra suhbati doirasida Transport vaziri o‘rinbosari Jasurbek Choriyev Spot muxbiriga ma’lum qildi.
Yanvar oyida Transport vazirligi dastlabki malaka tanlovi (RFQ) uchun arizalar qabuli boshlanganini e’lon qildi. Tender ikki marta (aprel oyida 21-maygacha uzaytirildi, mayda yana bir oyga surildi) qoldirildi. Undan keyin arizalar o‘rganib chiqildi, jumladan, hamkor bank — ehtimol Jahon banki tomonidan ham ko‘rib chiqildi.
Sentabr oyida uchta kompaniya tenderning ikkinchi bosqichi — taklif so‘roviga (RFP) o‘tkazildi. Endi ular loyiha bo‘yicha texnik va moliyaviy takliflarni taqdim etishlari kerak.
Vazir o‘rinbosari Toshkent-Andijon pulli avtomobil yo‘li loyihasi bo‘yicha tender g‘olibi 2026-yilning birinchi yarmida aniqlanishini ma’lum qildi.
“Menimcha, bu [2026-yil] birinchi yoki ikkinchi choragida amalga oshiriladi. Ikkinchi bosqich — RFPga uch nafar ishtirokchi o‘tdi. Bizda hali tayyorgarlik ishlari turibdi — ularga qo‘shimcha ma’lumot berishimiz kerak. Tender va ushbu kompaniyalar tomonidan tender hujjatlarini tayyorlash jarayoni odatda 3 oydan 6 oygacha davom etadi. Ularning talablariga qarab, biz moslashishimiz kerak. Agar ular o‘z takliflarini tezda taqdim eta olsalar, unda, ehtimol, tezroq [g‘olibni aniqlaymiz]”, — deya tushuntirdi Jasurbek Choriyev.
Toshkent-Andijon pulli yo‘li loyihasining yakuniy qiymati tender g‘olibi aniqlangandan so‘ng ma’lum bo‘ladi. 314 km uzunlikdagi ushbu trassa yo‘lga sarflanadigan vaqtni 2 soat 14 daqiqagacha qisqartirish imkonini beradi. Qurilish muddati taxminan 4 yilni tashkil etadi.
Yangi yo‘l loyihasi quyidagilarni nazarda tutadi:
- sement-beton qoplama;
- 1A toifadagi (avtomagistral) olti polosali;
- Uzunligi 33 km bo‘lgan 10 ta tunnel;
- maksimal tezlik — 150 km/soat;
- Umumiy uzunligi 1122 m bo‘lgan 102 ta yo‘l o‘tkazgich quriladi.
Avvalroq Spot Toshkent-Samarqand pulli yo‘li yakuniy bosqichda ekani, qurilish 2026-yilda boshlanishi haqida yozgandi.
