Toshkent xalqaro aeroportining uchib kelish terminalida yo‘lovchilarga xizmat ko‘rsatish uchun bir nechta rasmiy taksi xizmatlari va agregatorlari ish boshlaydi. Bu haqda Uzbekistan Airports xabar berdi.
Taxi Millenium, Let‘s Trip va Uzviptranservice yo‘lovchilarni uchib kelish terminalining oldidagi birinchi yo‘lakdan to‘g‘ridan-to‘g‘ri olib ketishlari mumkin bo‘ladi. Bungacha terminalga faqat Taxi Airport Tashkent va Sixt xizmatlari kiritilgan edi.
Shuningdek, Yandex Go avtomobillari ham terminal oldidagi birinchi yo‘lakka kira oladi. Buyurtmani qabul qilgan haydovchilarga yo‘lakka bepul kirish va yo‘lovchilarni 20 daqiqagacha kutish ruxsat etilgan.
Rasmiy xizmatlardan birining taksisini kelish zalida ochilgan yagona dispetcherlik xizmati peshtaxtasi orqali buyurtma qilish mumkin. Tashuvchilar agregatorlar narxlariga mos keladigan maxsus arzon tariflarni joriy etdi, deya qo‘shimcha qildi Uzbekistan Airports.
Rasmiy taksi xizmati mashinasida shahar bo‘ylab sayohat narxlari 50 ming so‘mdan boshlanadi. Yo‘lovchilar uchun guruhli va oilaviy transferlarni o‘z ichiga olgan bir nechta toifadagi paket takliflar mavjud.
Boshqa agregatorlar va xizmatlarning taksilari, shuningdek, kutib oluvchilarning shaxsiy va xizmat transporti qo‘shimcha yo‘lakdan foydalanishi mumkin. Unda to‘xtash vaqti chegarasi 10 daqiqa bo‘lib, avtomatik video kuzatuv yordamida nazorat qilinadi.
Shu yilning avgust oyida Uzbekistan Airports poytaxt aeroportining kelish zalida yo‘lovchilar va bagajni tashish xizmatlarini tashkil etish huquqi uchun tender e‘lon qilgandi. Kompaniyalarga taksi buyurtma qilish uchun beshta peshtaxta joyi taklif etildi.
Toshkent aeroportida taksi
Uzbekistan Airports 2022-yil sentabr oyida Toshkent aeroporti uchun yagona taksi xizmati sifatida Bobur Diyor kompaniyasini tanlagan edi. Kompaniya vaqt o‘tishi bilan boshqa taksi parklari uchun avtoturargohga kirishni ta’minlashga va’da berdi.
Raqobatni rivojlantirish qo‘mitasi aeroport operatoriga nisbatan bir qator ko‘rsatmalar berdi. Terminalga litsenziyaga ega va talablarga javob beradigan barcha taksi xizmatlarini kiritish monopoliyaga qarshi qonunbuzarliklarni bartaraf etishning asosiy sharti sifatida ko‘rsatildi.
Shuningdek, kompaniyadan texnik topshiriqdan qat’iy belgilangan tariflarni qo‘llash shartini chiqarib tashlash talab qilindi. Bundan tashqari, Qo‘mita iste’molchilarga terminalga kirish yo‘lida boshqa taksi operatorlari haqida ma’lumot berishni buyurdi.
Bunga javoban Uzbekistan Airports ko‘rsatma ustidan shikoyat qilish niyatini bildirdi va yagona taksi xizmati xalqaro terminaldan yo‘lovchilarni tashishni tartibga solishga imkon berganini ma’lum qildi. Shu bilan birga, u qo‘shimcha tashuvchilarni tanlashga va’da berdi.
2024-yil aprel oyida Toshkent aeroportida ikkinchi rasmiy taksi xizmati ishga tushirildi. Sixt Uzbekistan tanlov uchun uchta tarifni, shuningdek, mikroavtobusga buyurtma berish imkoniyatini taqdim etadi.
Avvalroq Wildberries Toshkentda WB Taxi xizmatini ishga tushirgandi.
