Telegram so‘nggi bir sutkada 187 634 ta kanal va guruhni bloklagan. Bu haqda messenjer saytida ma’lumot berilgan.
Qaysi aniq kanallar bloklangani ochiqlanmagan. Qayd etilishicha, ilova har kuni o‘n minglab guruh va kanallarni yopadi hamda foydalanish qoidalarini buzgan kontentni o‘chiradi.
Bular qatoriga zo‘ravonlikka undovchi, bolalarga nisbatan zo‘ravonlik sahnalarini o‘z ichiga olgan materiallar hamda noqonuniy tovarlar savdosi bilan shug‘ullanuvchi kanallar kiradi.
Yakshanba kuni bir sutkada 200 mingdan ziyod guruh va kanallarni blokladi. Bu yanvar oyi oxiridan buyon eng yuqori ko‘rsatkich bo‘ldi.
Ma’lumotlarga ko‘ra, yakshanba kuni messenjer 235 282 ta guruh va kanalni bloklagan. Bu 23-yanvardan buyon eng yuqori ko‘rsatkich hisoblanadi (o‘sha kuni 300 840 ta edi).
Fevral oyi boshidan buyon messenjer jami 1 856 069 ta guruh va kanalni bloklagan, shundan “terrorizm bilan aloqador” deb topilgan hamjamiyatlarning soni 7 016 tani tashkil etgan.
Qayd etilishicha, yil boshidan beri bloklangan guruhlar va kanallarning umumiy soni 7 mln 463 ming 178 tani tashkil qilgan.
Baza Telegram-kanali bugun Telegram 1-apreldan boshlab Rossiyada Instagram va Facebook kabi to‘liq bloklanishi mumkinligi haqida xabar berdi.
Deputat Svinchovning aytishicha, sananing tanlanishi hazil mazmunida bo‘lishi mumkin, shu bois uning fikricha, 1-apreldan bloklash kutilmaydi.
U shuningdek, aksincha, aprel boshigacha Telegram barcha e’tirozlarni bartaraf etishi mumkinligini ta’kidladi. Jumladan, Rossiyada yuridik shaxs ochish, shaxsiy ma’lumotlarni saqlash va qayta ishlash bo‘yicha zarur shartnomalarni tuzish hamda taqiqlangan kontentni bloklash choralarini ko‘rish imkoniyati bor.
Avvalroq Spot Roskomnadzor Rossiya hududida Telegram ishini rasman sekinlashtira boshlagani haqida xabar bergandi.
Messenjer asoschisi Pavel Durov idoraning harakatlariga izoh berdi. Uning ta’kidlashicha, Kreml rossiyaliklarni “davlat nazoratidagi, kuzatuv va siyosiy senzura uchun yaratilgan ilovaga” (ehtimol, Max messenjeri nazarda tutilmoqda — Spot izohi) o‘tishga majburlamoqchi.
Durov Eronning sakkiz yil oldin Telegramni “o‘ylab topilgan sabab bilan” bloklab, aholini davlat muqobiliga o‘tkazishga urinishini ta’kidladi. Biroq, eronliklarning aksariyati messenjerdan foydalanishda davom etmoqda va cheklovlarni chetlab o‘tmoqda, dedi u.
“Fuqarolarning erkinliklarini cheklash hech qachon to‘g‘ri qaror bo‘lmaydi. Telegram bosimdan qat’i nazar, so‘z erkinligi va maxfiylikni himoya qiladi”, — deya xulosa qildi Durov.
Roskomnadzor Telegram Rossiyaning shaxsiy ma’lumotlarni himoya qilish to‘g‘risidagi qonunchiligiga rioya qilmayotgani, firibgarlik va noqonuniy foydalanishga qarshi kurash choralarini ko‘rmayotganini ma’lum qildi.
Rossiya Davlat dumasi deputati Anton Nemkin qoidabuzarliklar bartaraf etilgandan so‘ng Telegramga kirish qayta tiklanishi mumkinligini tan oldi.
RIA Novosti xabariga ko‘ra, Telegram 8 ta ma’muriy bayonnoma bo‘yicha 64 mln rublgacha (10,21 mlrd so‘m) miqdorida jarima to‘lashi mumkin.
Xususan, yettita bayonnoma taqiqlangan kontentni o‘chirishni rad etganligi uchun, yana bittasi esa ushbu talabni takroran bajarmaganlik uchun tuzilgan.
