“O‘zbekoziqovqatxolding” xolding kompaniyasi oziq-ovqat sanoatining eng yaxshi mahsulotlarini markirovkalash bo‘yicha davlat dasturini taqdim etdi, deb xabar beradi Spot muxbiri.
Standartlar ishlab chiqilgan bo‘lib, ular bo‘yicha alohida komissiya har bir korxonaning mahsulotlarining jahon darajasidagi sifatga muvofiqligini ko‘rib chiqadi. Ta’kidlanishicha, xolding tarkibidagi 11 mingdan ortiq korxonalarning 80%ga yaqini ushbu standartlarga javob beradi.
“Albatta, har bir kompaniya markirovkani ololmaydi. Birinchidan, kompaniya sifat standartlariga javob berishi kerak. Asosiy vazifa iste’molchilarga mahalliy ishlab chiqaruvchilarning mahsulotlari xorijnikidan qolishmasligini ko‘rsatib berishdir. Ammo bu qandaydir tarzda importni cheklab qo‘yamiz degani emas”, — dedi “O‘zbekoziqovqatxolding” raisi Tohirjon Jalilov.
Unda nafaqat O‘zbekiston oziq-ovqat sanoati vakillarining mahsulotlarini qadoqlash, balki mahsulotlar namoyish qilinadigan vitrinalar, javonlar va boshqa savdo va ko‘rgazma jihozlari ham markirovkalanadi.
Xolding vakillarining so‘zlariga ko‘ra, markirovkalash sanoat korxonalarini mahsulot sifatini yaxshilashga rag‘batlantiradi. Shunday qilib, “O‘zbekoziqovqatxolding” alohida sifat belgisini olgan korxonalar ustidan doimiy monitoring olib boradi.
“Ushbu dastur orqali biz o‘zbekistonliklarning fuqarolik javobgarligini oshirishga, mahalliy mahsulotni sotib olib, ular mamlakat iqtisodiyotini, korxonani qo‘llab-quvvatlayotganliklarini anglab yetishlariga ham umid qilamiz. Umid qilamizki, iste’molchilarning mahalliy mahsulotlarga bo‘lgan ishonchi ortib borishi sotuv hajmining oshishiga olib keladi”, — dedi Tohirjon Jalilov.
U buning natijasida korxonada aylanma mablag' bo‘lishi, bu ishlab chiqarish quvvatini oshirishi va tashqi bozorga chiqish imkoniyatini berishini qayd etdi.
