1-iyuldan mahsulotlarning 17 raqamli identifikatsiya kodi joriy etiladi

1 iyuldan mahsulotlar (tovar va xizmatlar)ning 17 raqamli identifikatsiya kodi joriy etiladi. Bu haqda DSQ rasmiy telegram kanali xabar berdi.

Vazirlar Mahkamasining 2021-yil 28-apreldagi “Mahsulotlar (tovar va xizmatlar) yagona elektron milliy katalogini joriy etish, tadbirkorlik subyektlari o‘rtasida tuzilgan shartnomalarni elektron ro‘yxatdan o‘tkazish va tovar-moddiy boyliklarni olish uchun ishonchnomalarni elektron rasmiylashtirish chora-tadbirlari to‘g‘risida"gi 249-sonli qarori bilan mahsulotlarning (tovarlar va xizmatlarning) yagona elektron milliy katalogi tasdiqlandi.

Qaror bilan Davlat soliq qo‘mitasiga Mahsulotlarning yagona elektron milliy katalogini (pozitsiya, subpozitsiya, brend va atribut) kengaytirib borishi, ya’ni mahsulot va xizmatlarning identifikatsiya kod (MXIK)larini shakllantirishi vakolati berilgan.

Mahsulot va xizmatlarning identifikatsiya kodi — bu ma’lum bir mahsulot yoki xizmat turiga tayinlangan belgilar (raqamlar) to‘plami ko‘rinishida taqdim etilgan mahsulot va xizmatlarning identifikatsiya kodi.

Mazkur qaror ijrosini ta’minlash maqsadida elektron katalog bazasida mahsulot va xizmatlarga bosqichma bosqich 17 raqamli identifikatsiya kodlari yaratilmoqda.

Hozirda yuqori likvidli mahsulotlar, dori vositalari, tamaki va alkogol mahsulotlari hamda imtiyoz qo‘llanilgan mahsulot va xizmatlar uchun 10 mingdan ortiq identifikatsiya kodi yaratildi.

Barcha tadbirkorlik sub’ektlari tasnif.soliq.uz saytidagi shaxsiy kabinet orqali o‘zlariga tegishli bo‘lgan mahsulot va xizmatlar uchun 17 ta raqamli MXIKlarni saqlab olishlari mumkin.

Saytdan foydalanish bo‘yicha qo‘llanma bu yerda.