O‘zbekiston fuqarolari 25-sentabrdan boshlab Iordaniyaga vizasiz borishlari mumkin. Bu haqda Tashqi ishlar vazirligi matbuot kotibi Ahror Burxonov Spot’ga ma’lum qildi.
26-avgust kuni Samarqandda Shavkat Mirziyoyev va Iordaniya podshohi Abdulla II ibn al-Husayn o‘rtasida muzokaralar bo‘lib o‘tgandi. Tomonlar bir nechta hujjatlarni, jumladan, viza talablarini bekor qilish to‘g‘risidagi bitimni imzoladilar.
TIVning aniqlik kiritishicha, O‘zbekiston va Iordaniya o‘rtasida vizasiz rejimni joriy etish to‘g‘risidagi bitim imzolanganidan 30 kun o‘tib — 25 sentabrdan kuchga kiradi.
Unga ko‘ra, o‘zbekistonliklar Iordaniyada 30 kungacha vizasiz qolishlari mumkin bo‘ladi.
Bundan tashqari, tomonlar turizm sohasida hamkorlik to‘g‘risidagi bitim va havo qatnovi to‘g‘risidagi hukumatlararo bitimga o‘zgartirishlar kiritish to‘g‘risidagi bayonnomani imzoladilar. Xususan, poytaxtlar o‘rtasida — Toshkent-Amman yo‘nalishi bo‘yicha aviaqatnovlarni yo‘lga qo‘yish rejalashtirilgan.
Uchrashuv doirasida yetakchilar ikki mamlakat poytaxtlari o‘rtasida muntazam aviaqatnovlarning yo‘lga qo‘yilishi va vizasiz rejim joriy qilinishi ishbilarmonlik aloqalari va o‘zaro sayyohlar oqimining ko‘payishiga xizmat qilishini taʼkidlagandilar.
Bungacha o‘zbekistonliklar Iordaniyaga tashrif buyurganlarida vizani (visa on arrival) olishlari mumkin edi. Shu tariqa qirollik fuqarolar tashrif buyurishi uchun viza talab qilinmaydigan 36-davlatga aylanadi.
Avvalroq Spot Xitoyga vizalarni bron qilish bekor qilingandan so‘ng 66 foizga oshgani, chiptalar narxi esa 44 foizga arzonlashgani haqida yozgandi.
