O‘zbekiston kompaniyasi Germaniyaning ikkita kompaniya bilan birga yuqori aniqlikdagi metallga ishlov berish uskunalarini joriy etadi. Bu haqda Investitsiyalar, sanoat va savdo vazirligi xabar berdi.
27-noyabr kuni vazir o‘rinbosari Akram Aliyev boshchiligida Germaniyaning Mikromat GmbH va Tech Pro Engineering GmbH kompaniyalari, O‘zbekistonning esa Auto Spring Components kompaniyasi vakillari ishtirokida uchrashuv bo‘lib o‘tdi.
Muzokaralarda tomonlar qo‘shma sanoat loyihasining amalga oshirilishi, texnologik jarayonlarning borishi, ishlab chiqarish quvvatlarini oshirish masalalari bo‘yicha rejalarni muhokama qildi.
Shuningdek, texnologik yechimlar va ishlab chiqarish zanjirlarining samaradorligini oshirish masalalariga alohida e‘tibor qaratildi.
Mikromat, Tech Pro Engineering va Auto Spring Components kompaniyalari o‘rtasida uch tomonlama hamkorlik memorandumi imzolandi. Ushbu hujjat texnologiyalar transferini chuqurlashtirish, ishlab chiqarishni modernizatsiya qilish hamda yuqori aniqlikdagi metallga ishlov berish uskunalarini joriy etish bo‘yicha hamkorlikni nazarda tutadi.
Tomonlar qo‘shma faoliyatni faollashtirish, ishlab chiqarish dasturlarini kengaytirish hamda O‘zbekistonda yuqori qo‘shilgan qiymatga ega sanoat mahsulotlarini ishlab chiqarishga qaratilgan tashabbuslarni amalga oshirishga tayyor ekanliklarini tasdiqladi.
Aprel oyida Farg‘onada qiymati $120 mlnlik metallga ishlov berish zavodini tashkil etish rejalashtirilayotgani haqida xabar berilgandi.
Avvalroq Andijon va Namanganda Germaniya dual kasbiy taʼlim modeli joriy etilishi haqida xabar berilgan edi. Unda metallga ishlov berish, montaj, konstruksiya qilish yo‘nalishlarida kasbga tayyorlash rejalashtirilgani aytilgandi.
