Prezident pirotexnika buyumlarining muomalasi to‘g‘risidagi qonunni imzoladi. Bu haqda Adliya vazirligi xabar berdi.
Hujjatga ko‘ra, pirotexnik tarkibning yonishi (portlashi) yordamida optik, akustik, elektr va boshqa vizual effektlarni hosil qilish uchun mo‘ljallangan qurilmalar pirotexnika buyumlaridir.
Pirotexnika buyumlari ularning xavflilik zonasi, shu jumladan atrofdagi fazoning zararlanish darajasidan kelib chiqib, xavflilikning I — V sinflariga bo‘linadi.
O‘zbekistonda xavflilikning I sinfiga kiruvchi pirotexnika buyumlarini jismoniy va yuridik shaxslar tomonidan ishlab chiqarish, tayyorlash, O‘zbekistonga olib kirish, tashish, o‘tkazish, sotib olish, saqlash va ulardan foydalanishga ruxsat beriladi.
O‘zbekistonda xavflilikning II — V sinflariga kiruvchi pirotexnika buyumlarini ishlab chiqarish, tayyorlash, O‘zbekistonga olib kirish, tashish, jo‘natish, o‘tkazish, sotib olish, saqlash va ulardan foydalanish taqiqlanadi.
Xavflilikning II-V sinflariga kiruvchi pirotexnika buyumlarini davlat ishtirokidagi mudofaa sanoati korxonalari tomonidan ishlab chiqarishga, tayyorlashga, saqlashga, tashishga va o‘tkazishga ruxsat beriladi.
Xavflilikning III-V sinflariga kiruvchi pirotexnika buyumlaridan mushakbozlik tashkil etilishi belgilangan ommaviy tadbirlarda foydalanishga ruxsat beriladi.
Shuningdek, xavflilikning II-V sinflariga kiruvchi pirotexnika buyumlarini sanoat va harbiy maqsadlarda O‘zbekistonga olib kirish, tashish, saqlash va ulardan foydalanish mumkin.
Senatning 2025-yil noyabrida o‘tkazilgan o‘n birinchi yalpi majlisida ushbu qonun maʼqullangandi.
Unda xavflilikning I toifasiga kiruvchi pirotexnika vositalari sifatida bengal mayoqchalari, stol fontanlari, xlopushka kabi xavfli hudud radiusi 0,5 metrdan oshmaydigan buyumlar ekanligi aytilgan edi.
Xavflilikning II toifasiga kiruvchi pirotexnika vositalari esa — petardalar, ochiq maydonlarda foydalanishga mo‘ljallangan pirotexnik fontanlar kabi xavfli hudud radiusi 5 metrgacha bo‘lgan pirotexnika buyumlari hisoblanadi.
Bundan tashqari:
- xavflilikning III toifasiga — xavfli hudud radiusi 20 metrdan oshmaydigan pirotexnik sharlar, mushakbozlik batareyalari kabi qurilmalar;
- xavflilikning IV toifasiga — xavfli hudud radiusi 20 metrdan yuqori bo‘lgan park feyerverklari, balandlikda foydalaniladigan feyerverklar va boshqalar;
- xavflilikning V toifasiga kiruvchi pirotexnika buyumlari gidrometeorologik, qutqaruv va boshqa maxsus maqsadlarga mo‘ljallangan buyumlar, jumladan, raketalar, signal mash‘allari, temir yo‘l petardalari kiradi.
Pirotexnika buyumlarining muomalasi ustidan davlat nazorati Milliy gvardiya, ichki ishlar va bojxona organlari tomonidan amalga oshiriladi.
Qonun rasmiy eʼlon qilingan kundan 3 oy o‘tgach kuchga kiradi.
Avvalroq zargarlik buyumlarining noqonuniy aylanmasini kamaytirishga qaratilgan qonun loyihasi maʼqullangandi.
