Avvalroq Spot Shavkat Mirziyoyev 14-aprel kuni uy-joy qurilishi va urbanizatsiya sohasidagi ustuvor vazifalar yuzasidan yig‘ilish o‘tkazgani haqida yozgan edi.
Samarqanddagi Yuksalish Group korxonasi (yuridik shaxs — Yuksalish Quruvchi) ta’sischisi Anvar Temirov so‘zlariga ko‘ra, beshta hududda qurilish ishlarini olib borayotgan kompaniyaning yillik aylanmasi 450 mlrd so‘mni tashkil etadi, xodimlar soni esa 3 mingdan ortiq. Hozirgi kunda kompaniya 14 mingta xonadon qurmoqda, 4 mingga yaqin uy-joy foydalanishga topshirilgan. 2026-yilda yana 6 mingdan ortiq xonadon kalitini o‘z egalariga topshirish rejalashtirilgan.
Tadbirkor prezidentga taklif bilan murojaat qildi: hozirda obyekt maydonidan qat’i nazar qurilish muddati 2 yil etib belgilangan. Agar bu muddatdan oshib ketsa, yer solig‘i stavkalari oshiriladi. Uning so‘zlariga ko‘ra, xaridorlar oddiy uy-joy bilan cheklanib qolmay, zamonaviy va yuqori sifatli xonadonlarni talab qilmoqda, biroq quruvchilarga bunday loyihalarni amalga oshirish uchun biroz vaqt yetishmayapti.
Shundan kelib chiqib, Anvar Temirov maydoni 10 ming kvadrat metrdan yuqori bo‘lgan obyektlar uchun qurilish muddatini 3 yilgacha uzaytirishni taklif qildi. “Bu biz uchun katta iqtisod bo‘lardi va biz qo‘rqmasdan millionlab kvadrat metr va katta shaharlar qurish haqida o‘ylashni boshlardik”, — deya qo‘shimcha qildi u.
“To‘g‘ri masalani ko‘tarayapti. Bu tijorat maydonlari tannarxining pasayishiga olib keladi. Bir oy muddatda mana shu qarorni kiritinglar. Anvarga o‘xshaganlar bo‘lsa, u katta-katta marralarni olyapti, bunga imkoniyat yaratishimiz kerak. Bu ham to‘g‘ri taklif, albatta inobatga olamiz. Uy-joy biz uchun havodek zarur, lekin sizlar ham sifatga juda qattiq qarashingiz kerak — bu bizning juda katta talabimiz”, — deya javob berdi prezident.
KTYDR ma’lumotlariga ko‘ra, Yuksalish Group 2017-yil iyun oyida ro‘yxatdan o‘tgan. Ustav fondi 1,7 mlrd so‘m bo‘lgan kompaniya turar-joy binolarini qurish bilan shug‘ullanadi. Ta’sischilar sifatida Ochilov Shokir Baxriddinovich (29,31%), Temirov Anvar G‘ayrat o‘g‘li (41,38%) va Otakulov Otajon Sunnatovich (29,31%) ko‘rsatilgan. Shuningdek, Shokir Ochilov korxona rahbari hisoblanadi.
2025-yil sentabr oyida prezident O‘qituvchi va murabbiylar kuni munosabati bilan Yuksalish quruvchisi Anvar Temirovni “Shuhrat” medali bilan taqdirlagan edi.
Avvalroq Spot 1-iyuldan qurilishga ruxsat va texnik shartlarni olish tartibi soddalashtirilishi haqida yozgandi.
