O‘zbekistonda integratsiyalashgan atom elektr stansiyasidan elektr energiyasi narxi kVt/soat uchun 1000 so‘mdan past bo‘ladi. Bu haqda 4-iyun kuni Vazirlar Mahkamasi huzuridagi Atom energiyasi agentligi (O‘zatom) direktori Azim Axmedxadjayev ma’lum qildi, deya xabar bermoqda Spot muxbiri.
“Bizda bosqichma-bosqich yondashuv mavjud. Hozir aniq narx haqida gapirmagan bo‘lardim, lekin shuni aytishim mumkinki, u [elektr energiyasi] uchun joriy tariflarning o‘rtacha parametrlarida”, — deb javob berdi u.
O‘zatom rahbarining ta’kidlashicha, tariflarni belgilashda mamlakat elektr energiyasi bozorining rivojlanishi, jumladan, joriy yilning yanvar oyida e’lon qilingan energetika va kommunal sektorning yagona regulyatorini yaratish hisobga olinadi.
Uning so‘zlariga ko‘ra, narxlarni bozor belgilaydi. Xususan, yiliga 10 mln kVt⋅soatdan ortiq elektr energiyasi iste’mol qiladigan ulgurji iste’molchilar uchun ulgurji bozorda soatbay narxni belgilaydigan to‘g‘ridan-to‘g‘ri shartnomalar bo‘yicha xarid qilish tizimini joriy etish taklif etildi.
“Ha, bizda hozircha iqtisodiy hisob-kitoblar bor, lekin birinchi elektr energiyasi yetkazib berila boshlanganda u qanday bo‘lishini hozir aniq ayta olmayman”, — deya xulosa qildi Axmedxadjayev.
Spot muxbirining AESda ishlab chiqariladigan elektr energiyasi narxi bir kVt/soat uchun 1000−1100 so‘mdan oshib ketadimi, degan savoliga O‘zatom rahbari: “Yo‘q, albatta, undan past bo‘ladi”, — deb javob berdi.
Tinch atom
2025-yil sentabr oyida O‘zatom va Rosatom O‘zbekistondagi AES loyihasining yangi konfiguratsiyasi — ikkita katta quvvatli energoblok va ikkita kichik quvvatli atom stansiyasi blokidan iborat tarkib bo‘yicha kelishib olgandi.
Qo‘shimcha kelishuv loyiha tarkibiga 3+ avlodiga mansub VVER-1000 asosidagi ikkita katta quvvatli energoblok hamda har birining quvvati 55 MVt bo‘lgan RITM-200N reaktorli ikkita energoblok kiritilishini nazarda tutadi. Shu tariqa, integratsiyalashgan AESning umumiy quvvati 2,1 GVt dan oshadi: katta stansiyaniki — 2 GVt, kichiginiki — 110 MVt.
Oktabr oyida O‘zbekistonda kichik AES qurilishining asosiy bosqichi boshlandi. Jizzax viloyatidagi qurilish maydonchasida RITM-200N reaktorli energoblok poydevori uchun kotlovan qazish ishlariga kirishildi.
Joriy yil mart oyida Jizzax viloyatidagi AES qurilish maydonida dastlabki beton ishlari boshlandi. Ishlar yakuniga ko‘ra, gidroizolyatsiya va yerga ulash tizimiga ega reaktor binosi poydevori tayyorlanadi.
Bundan tashqari, O‘zbekiston va Rossiya integratsiyalashgan AES qurilishi bo‘yicha shartnomaga qo‘shimcha kelishuv imzoladi. Loyiha kichik va katta quvvatli atom stansiyalarini bir vaqtning o‘zida joylashtirishni nazarda tutadi.
Qo‘shimcha bitimga ko‘ra, loyiha tarkibiga 3+ avlod VVER-1000 asosidagi ikkita katta quvvatli energoblok va har birining quvvati 55 MVt bo‘lgan RITM-200N reaktorli ikkita energoblok kiradi. Shunday qilib, integratsiyalashgan AESning umumiy quvvati 2,1 GVt dan oshadi: katta stansiya — 2 GVt, kichik — 110 MVt.
Avvalroq Spot O‘zbekistonda kam quvvatli atom elektr stansiyasini qurish loyihasi Rossiya sanoatiga $24 mlrdgacha bo‘lgan buyurtmalarni olib kelishi haqida yozgandi.
