Istiqbolli loyihalar milliy agentligi “Tartibga solish qumdoni” huquqiy rejimining birinchi ishtirokchisini ro‘yxatdan o‘tkazdi. Bu haqda agentlik matbuot xizmati xabar berdi.
Xususan, Gruziyaning “Bank of Georgia” banki O‘zbekiston kapital bozoridagi maxsus rejim ishtirokchisi bo‘ldi.
Bank London fond birjasida listingga kiritilgan “Bank of Georgia Group PLC"ning sho‘ba kompaniyasi sanaladi. Kompaniyaning asosiy aksiyadorlarini xalqaro va global investitsiya fondlari va investitsiya kompaniyalari tashkil etadi.
“Bank of Georgia” maxsus rejim ishtirokchisi hamda “Qimmatli qog‘ozlar markaziy depozitariysi” va respublikasi valyuta birjasi depozitariylarida xorijiy nominal saqlovchi sifatida qimmatli qog‘ozlar hisobini ochish va boshqarish huquqiga ega. Qo‘shimcha litsenziyasiz Markaziy bankda milliy va xorijiy valyutada naqd pul hisob raqamiga ega bo‘lishi mumkin.
Agentlik Gruziya bankining maxsus rejimda ishtirok etishi mamlakat qimmatli qog‘ozlar bozoriga yirik investitsiyalar jalb qilinishi, global va xorijiy kastodianlar va depozitariylar, global investorlar va xorijiy investitsiyalar uchun vositachi sifatida xizmat qilishini bildirdi.
Yanvar oyi oxirida “Tartibga solish qumdoni” maxsus huquqiy rejimni taqdim etish tartibi to‘g‘risidagi nizom Adliya vazirligida ro‘yxatdan o‘tkazildi. 2023-yil oxirida Istiqbolli loyihalar milliy agentligi nizom loyihasini e’lon qilgandi.
“Qumdon” prezidentning 2023-yilning sentabridagi qaroriga muvofiq xorijiy investorlarning qimmatli qog‘ozlar mahalliy bozoriga kirishini ta’minlashga qaratilgan.
“Tartibga solish qumdoni” doirasida faqat O‘zbekistonda tan olingan xorijiy yurisdiksiyalardan birining qimmatli qog‘ozlar bozorida faoliyat yuritish litsenziyasiga ega bo‘lgan yuridik shaxslarga ishlashga ruxsat etiladi. Ularning ro‘yxati NAPP tomonidan tasdiqlangan.
Xususan, ro‘yxatga 38ta davlat kiritilgan bo‘lib, ulardan investitsiya vositachilari o‘z profili bo‘yicha mahalliy litsenziyasiz ishlashlari, filial yoki yuridik shaxs tashkil etishi mumkin bo‘ladi.
