Andijon viloyatida yashovchi 250 dan ziyod fuqaro qishloq xo‘jaligi va chorvachilik sohasida vaqtinchalik mehnat faoliyatini amalga oshirish uchun Belarusga yetib bordi.
Migratsiya agentligi xabariga ko‘ra, mehnat migrantlarining birinchi guruhi Belarusga charter reysida uchib ketgan. Loyiha Andijon viloyati hokimligi, Migratsiya agentligi hamda Vitebsk viloyati Mehnat, bandlik va ijtimoiy himoya qo‘mitasi o‘rtasidagi uch tomonlama kelishuv asosida soddalashtirilgan tartibda amalga oshirilmoqda.
Andijon viloyati hokimi respublikada ishlash istagini bildirgan 255 nafar fuqaro Belarusga yetib kelganini ma‘lum qildi. Ularni Vitebsk aeroportida Shuhratbek Abdurahmonov boshchiligidagi delegatsiya va Vitebsk viloyat ijroiya qo‘mitasi vakillari kutib oldi.
O‘zbekistonliklarga munosib mehnat sharoitlari, yuqori maosh va ijtimoiy kafolatlar va‘da qilinmoqda. Rasmiylarning fikricha, loyiha aholini ish bilan ta‘minlash, oilalar uchun barqaror daromad manbayini yaratish hamda O‘zbekiston va Belarus o‘rtasidagi hamkorlikni rivojlantirishga xizmat qiladi.
Shavkat Mirziyoyevning 8−9-iyul kunlari Minskka davlat tashrifi chog‘ida O‘zbekiston va Belarus o‘rtasida tashkiliy asosda jalb etish to‘g‘risidagi bitim imzolandi. Hujjat O‘zbekiston fuqarolarini Belarusda vaqtinchalik ishlashga jalb etish tartibini belgilaydi: nomzodlarni tanlash bilan Migratsiya agentligi shug‘ullanadi, Belarus ish beruvchilari esa zarur ruxsatnomalarni rasmiylashtirib, mehnat shartnomalarini tuzadi.
Muzokaralar chog‘ida prezident Aleksandr Lukashenko mamlakatda ishchi kuchi yetishmasligini ta‘kidlab, o‘zbekistonliklarni Belarusga oilalari bilan ishlashga kelishga taklif qildi.
“O‘zbekistonda suv tanqis, yer ham ko‘proq bo‘lsa, yaxshi bo‘lardi. Bizda, Belarusda bu bor. Ba‘zan ishchi kuchi yetishmaydi. Shu sababli biz o‘zbekistonliklar oilalari bilan Belarusga kelib, shu yerda o‘rnashib, yordam — sog‘liqni saqlash, zarur bo‘lsa, ta‘lim olib, rivojlanishlarini xohlardi”, — deya ta‘kidladi Lukashenko.
Spot, avvalroq, o‘zbekistonliklarning Belarusda ro‘yxatdan o‘tmasdan bo‘lish muddati 3 kundan 10 kunga uzaytirilishi haqida yozgandi.
