Uzbekistan Airways O‘zbekiston shaharlaridan Rossiyaga parvozlar sonini qisqartiradi. Bu haqda milliy aviatashuvchi matbuot xizmati o‘zining Telegram-kanalida xabar berdi.
Aviakompaniya parvozlar dasturidagi joriy o‘zgarishlar haqida ma’lum qildi.
“Aviatsiya yoqilg‘isi tanqisligi va uning narxi oshishi munosabati bilan O‘zbekiston shaharlaridan Rossiyaga ayrim yo‘nalishlar bo‘yicha parvozlar sonini qisqartirishga majburmiz”, — deyiladi xabarda.
Spot nashri Rossiya shaharlariga, jumladan Moskva va Sankt-Peterburgga amalga oshiriladigan ayrim reyslar soni qisqartirilishini aniqladi. Shu munosabat bilan Spot Uzbekistan Airways matbuot xizmatidan izoh so‘radi.
Bekor qilingan reyslar yo‘lovchilari uchun qo‘shimcha to‘lovlarsiz yo‘nalish bo‘yicha keyingi mavjud reysga jo‘nab ketishni ko‘chirish imkoniyati bilan bepul qayta bron qilish, shuningdek, jarimalarsiz mablag‘larni to‘liq qaytarish imkoniyati mavjud.
Qaytarish chipta sotib olingan joyda amalga oshiriladi. Agar chipta Uzbekistan Airways veb-sayti yoki ilovasida band qilingan bo‘lsa, yo‘lovchilar offers@uzairways.com elektron manziliga so‘rov yuborishlari kerak.
Aviakompaniya joriy jadval va aviachiptalarni bron qilish uzairways.com rasmiy veb-saytida yoki mobil ilovada mavjudligini eslatib, yo‘lovchilarga tushunganliklari uchun minnatdorchilik bildirdi.
Aprel oyida Centrum Air xususiy aviakompaniyasi aviatsiya yoqilg‘isi qimmatlashgani sababli xalqaro reyslarning bir qismi uchun narxlarni oshirishi haqida xabar berdi.
Aviakompaniya ayrim xalqaro yo‘nalishlarda yoqilg‘i yig‘imlariga tuzatish kiritganini ma’lum qilib, bu qarorini jahon bozorlarida aviatsiya yoqilg‘isi narxining sezilarli darajada oshgani bilan izohladi.
Bu butun dunyo bo‘ylab aviakompaniyalar Yaqin Sharqdagi mojaro fonida aviatsiya yoqilg‘isi narxi ikki baravardan ko‘proqqa oshgani sababli minglab reyslarni bekor qilayotgani fonida sodir bo‘lmoqda.
Bundan tashqari, may oyi oxirida Rossiya hukumati aviatsiya kerosinini, shu jumladan birja savdolarida sotib olinganlarini eksport qilishni 30-noyabrgacha taqiqladi.
Energetika vazirligining Spot’ga ma’lum qilishicha, Rossiya tomonidan aviayoqilg‘i eksportiga joriy etilgan vaqtinchalik taqiq O‘zbekistonga yetkazib berishga ta’sir ko‘rsatmaydi — bu amaldagi hukumatlararo kelishuv tufayli amalga oshiriladi.
Avvalroq Spot O‘zbekiston Rossiyadan gaz importini 70% ga oshirib, 11 mlrd kub metrga yetkazmoqchi elkanligi haqida yozgandi.
