Markaziy bank boshqaruvi 24-oktabrdagi yig‘ilishida Pul-kredit siyosatining 2026-yil va 2027−2028-yillar davriga mo‘ljallangan asosiy yo‘nalishlari konseptual loyihasini tasdiqladi. Bu haqda regulyator matbuot xizmati xabar berdi.
Pul-kredit siyosatning asosiy yo‘nalishlari Markaziy bankning joriy iqtisodiy vaziyat va o‘rta muddatli istiqbolda kutilayotgan makroiqtisodiy rivojlanish bo‘yicha qarashlarini hamda narxlar barqarorligini taʼminlashga qaratilgan choralarini belgilaydi. Bunda narxlar barqarorligi hamda inflyatsiyani 5% lik target darajasiga yetkazish inobatga olinadi.
Loyihani ishlab chiqishda tashqi va ichki sharoitlarning o‘rta muddatli istiqboldagi rivojlanish kutilmalari va ular asosida makroiqtisodiy rivojlanishning asosiy ssenariysi, muqobil xatarlar tahlili hamda pul-kredit siyosati choralari va ularni takomillashtirib borishga asoslandi.
O‘rta muddatli prognozlarni ishlab chiqish va mos ravishda pul-kredit siyosatining asosiy yo‘nalishlarini belgilashda makroiqtisodiy rivojlanishning asosiy ssenariysi ishlab chiqildi.
Tashqi sharoitlar bahosida jahon iqtisodiyotidagi noaniqliklar saqlanishi va global o‘sish surʼatlarining nisbatan past bo‘lishi kutilmoqda. Shu bilan birga, inflyatsiyani maqsadli darajaga tushirish uzoqroq vaqt talab etishi, valyuta bozorlarida keskin o‘zgarishlar kuzatilmasligi va oltin narxlari yuqori darajada saqlanishi taxmin qilindi.
Ichki sharoitlarni belgilashda esa yalpi talabning barqarorlashib borishi, kreditlash jarayonlarining mo‘tadillashuvi, pul o‘tkazmalari o‘sishining o‘rta muddatli trayektoriyasiga qaytishi, investitsiyalar oqimining barqaror shakllanishi, fiskal taqchillik o‘rta muddatda YIMga nisbatan 3% dan oshmasligi nazarda tutildi.
Asosiy ssenariyga ko‘ra, 2026-yilda real YIM o‘sishi 5,5−6,5%, 2027−2028-yillarda esa 6−7% darajasida prognoz qilinmoqda.
Makroiqtisodiy rivojlanishning asosiy ssenariysi va boshqa shoklar sharoitida ham pul-kredit siyosati 5% lik targetga qaratiladi. Bunda shoklar taʼsiri ko‘lami va davomiyligidan kelib chiqib, qatʼiylik darajasi va muddatlariga o‘zgartirish kiritib boriladi.
Prognozlarga ko‘ra, 2026-yil oxiriga qadar umumiy inflyatsiya 7% gachani tashkil etishi kutilmoqda.
Tashqi inflyatsion bosimning kamayishi va inflyatsion kutilmalarning barqarorlashuvi 2027-yilda inflyatsiyani 5% lik target darajasigacha pasaytirishi va 2028-yildan bu 5% atrofida shakllanishi kutilmoqda.
Markaziy bank ushbu prognozlar xususiylashtirishning davom etishi, xususiy va xorijiy investitsiyalar hajmining barqaror o‘sishi, iqtisodiyotni kreditlash surʼatlarining maqbullashishi hamda iqlim o‘zgarishlari bilan bog‘liq xatarlar kuzatilmasligini inobatga olishini qayd etdi.
Ichki va tashqi kutilmagan xatarlar yuzaga kelishi bilan bog‘liq makroiqtisodiy rivojlanish ssenariylari ishlab chiqildi. Bunda xatarlar bir vaqtda ro‘y berishi ehtimoli pastligi sabab, ular avvalgidek birlashtirilgan holda emas, balki har biri alohida tahlil qilindi.
Makroiqtisodiy rivojlanishning asosiy ssenariysidan farqli ravishda, kelgusi yillarda yuzaga kelishi mumkin bo‘lgan tashqi va ichki xatarlar alohida o‘rganildi. Unda iqtisodiy ko‘rsatkichlarning asosiy ssenariydagi prognoz darajasidan chetlashishi baholandi.
Ushbu sharoitlar yuzaga kelgan taqdirda pul-kredit sharoitlari qatʼiylik darajasi va davriyligiga tegishli o‘zgartirishlar kiritilishi tahlil qilindi. Bunda eʼtibor o‘rta muddatli istiqbolda inflyatsiyani target ko‘rsatkichiga erishishiga qaratildi.
Shuningdek, kelgusi yillarda pul-kredit siyosati samaradorligini yana-da oshirish bo‘yicha rejalar ham keltirilgan. Pul-kredit siyosati qarorlarining taʼsirini oshirish uchun operatsion mexanizmni takomillashtirish hamda makroiqtisodiy prognoz va tahlil salohiyatini kuchaytirish maqsad qilingan.
“Bu doirada mavjud modellar parametrlari qayta baholanib, yangi modellar joriy etiladi hamda pul-kredit siyosati kommunikatsiyasi yana-da faollashtiriladi”, — deyliadi Markaziy bank xabarida.
Spot, avvalroq, Markaziy bank yil yakuni bilan inflyatsiya 8% gacha pasayishini kutayotgani haqida yozgandi.
