Markaziy bank raisi Timur Ishmetov 24-avgust kuni Silk Road Finance & Technology Forumida O‘zbekiston fintex sektorini rivojlantirish bo‘yicha yangi chora-tadbirlar haqida gapirdi. Ular innovatsion xab va venchur fond tashkil etish, mutaxassislar tayyorlash hamda raqamli valyutani o‘rganishni o‘z ichiga oladi.
Regulyator 2026−2030-yillarga mo‘ljallangan fintexni rivojlantirish milliy strategiyasi ishlab chiqilayotganini ma’lum qilgan edi. Hujjat innovatsiyalarni, zamonaviy moliyaviy infratuzilmani rivojlantirish, kapital va kadrlardan foydalanish imkoniyatini ta’minlash, shuningdek, O‘zbekistonni Markaziy Osiyoda fintex rivoji uchun muhim maydonga aylantirishni nazarda tutadi.
Innovatsion xab va venchur fondi
Markaziy bank fintex loyihalarini rivojlantirish uchun innovatsion xab tashkil etilganini e’lon qildi. Rezidentlarning birinchi guruhini 2026-yilning to‘rtinchi choragidan qabul qilish rejalashtirilgan. Markaz loyihalarni inkubatsiya va akseleratsiya bosqichidan tortib, tartibga solish bo‘yicha maslahatlar berish, sinovdan o‘tkazish va yechimlarni bozorga chiqarishga tayyorlashgacha kuzatib boradi.
Bundan tashqari, Markaziy bank ixtisoslashtirilgan venchur fondini tashkil etdi. Regulyator xalqaro boshqaruv fondlari bilan muzokaralar olib bormoqda va loyihalarni innovatsion xabdan xalqaro miqyosga o‘tkazishning to‘g‘ridan-to‘g‘ri mexanizmini shakllantirish niyatida.
Yana bir yo‘nalish — to‘lov tizimi, ochiq banking va moliyaviy infratuzilmaning operatsion barqarorligini yanada rivojlantirish. Markaziy bank rahbarining so‘zlariga ko‘ra, buning uchun zarur me’yoriy model, boshqaruv tizimi va texnik arxitektura allaqachon yaratilgan.
“Siyosatning ushbu takomillashuvi moliya tizimining kelajakdagi muammolarga tayyorligini ta’minlaydi”, — dedi Ishmetov.
5 ming yoshni o‘qitish va raqamli so‘m
Markaziy bank, shuningdek, 2030-yilgacha fintex sohasida 5 ming talabani tayyorlash dasturini ishga tushirmoqda. Birinchi guruh 2026-yil oxirigacha Singapur universitetlari va Global Finance & Technology Network (GFTN) bilan hamkorlikda ishlab chiqilgan dastur asosida o‘qishni boshlaydi. U moliyaviy texnologiyalar sohasida akademik tayyorgarlik va amaliy ko‘nikmalarni uyg‘unlashtiradi.
Bundan tashqari, forum doirasida regulyator Markaziy bankning raqamli valyutasi (CBDC) bo‘yicha “oq kitob"ni (white paper) nashr etish niyatida. Hujjatda bunday valyutadan foydalanishning mumkin bo‘lgan ssenariylari, uning arxitekturasi variantlari, asosiy kelishuvlar va moliya tizimiga potensial ta’siri ko‘rib chiqiladi.
“Olingan natijalar O‘zbekistonda innovatsiyalar va raqamli iqtisodiyotni qo‘llab-quvvatlash uchun optimal yondashuvni sinab ko‘rish va raqamli valyutadan foydalanish imkoniyatlarini baholashga qaratilgan tajriba bosqichini boshlashga yordam beradi”, — deya xulosa qildi Ishmetov.
Avvalroq Spot O‘zbekiston investitsiya darajasidagi kredit reytingini olib, JSTga a‘zo bo‘lishni yakunlamoqchi ekani haqida yozgandi.
