2026-yilning birinchi yarmida O‘zbekistonga xorijdan pul o‘tkazmalari hajmi $9 mlrddan ortiqqa oshdi. Bu haqda Markaziy bankning ichki valyuta bozori sharhida keltirilgan.
Unga ko‘ra, yanvar-iyun oylarida mamlakatga xalqaro pul o‘tkazmalari orqali $9,3 mlrd kelib tushgan bo‘lib, bu o‘tgan yilning mos davriga ($8,2 mlrd) nisbatan 13% ga, 2024-yilga ($6,5 mlrd) nisbatan esa qariyb 44% ga ko‘pdir.
Shu bilan birga, O‘zbekistondan chiqib ketgan mablag‘lar hajmi bir yil oldingi $1,23 mlrd va ikki yil oldingi $1,25 mlrdga nisbatan biroz oshib, $1,33 mlrdga yetdi. Natijada xalqaro pul o‘tkazmalarining ijobiy saldosi qariyb $8 mlrdni tashkil etdi.
Shuningdek, Markaziy bank jismoniy shaxslarning banklar bilan amalga oshirgan operatsiyalarining ijobiy saldosi ichki bozorda qo‘shimcha taklif manbai bo‘lib xizmat qilganini qayd etdi.
Dastlabki olti oyda aholi banklarga $12,26 mrdlik xorijiy valyuta sotdi — bu o‘tgan yilga nisbatan ($9,1 mlrd) qariyb 1,4 barobar ko‘pdir. Jismoniy shaxslar tomonidan valyuta sotib olish hajmi 26% ga oshib, $5,39 mlrddan $6,77 mlrdga yetdi.
Natijada, fuqarolar tomonidan xorijiy valyuta taklifi unga bo‘lgan talab hajmidan $5,49 mlrdga ortiq bo‘ldi.
Taqqoslash uchun: bir yil avval ijobiy saldo $3,71 mlrdni, 2024-yilning birinchi yarmida esa $2,6 mlrdni tashkil etgan edi.
Avvalroq Spot O‘zbekistonda valyuta taklifi talabdan tezroq o‘sgani, taqchillik qisqargani haqida yozgan edi.
