“O‘zbektelekom” operator va provayderlar uchun narxlarni arzonlashtirmoqda

Joriy yil 1-maydan operator va provayderlarga xalqaro paketli kommutatsiya markazi (XPKM) orqali taqdim etiladigan kanal narxi oldingi tariflarga nisbatan 20% gacha (32 ming so‘m) arzonlashtirilishi kutilmoqda. Bu haqda kompaniyaning telegramdagi rasmiy kanali xabar beradi.
⠀
Mazkur xizmat narxi so‘nggi 3 yil ichida 7,5 barobardan ko‘proqqa arzonlashtirilganligini ko‘rsatmoqda.
⠀
2020-yil yakunida IP-transport xizmatlari bo‘yicha “Ma'lumotlarni uzatish magistral va multservis tarmoqlarini kengaytirish” loyihasi doirasida “O‘zbektelekom” AK tomonidan amalga oshirilgan ishlar natijasida, transport tarmog‘ining o‘tkazuvchanlik qobiliyati viloyat markazlarigacha 2 barobarga, tuman markazlarigacha esa 4 barobarga oshirilgan.
⠀
Mazkur loyiha bo‘yicha ishlarning asosiy qismi yakunlanganligi munosabati bilan, 2021-yil 1-yanvardan IP-transport xizmatlarining narxi 2 barobarga arzonlashtirilgan edi.
2021-yil 1-maydan ushbu xizmat joriy narxi yana 30% ga arzonlashtirilmoqda.
⠀
Bu, o‘z navbatida, operator va provayderlarning respublikamizning chekka hududlarida faoliyatini rivojlantirish uchun shart-sharoitlar yaratadi.