Shavkat Mirziyoyev “Aholining yengil avtotransport vositalariga bo‘lgan ehtiyojini qondirish bo‘yicha qo‘shimcha chora-tadbirlar to‘g‘risida"gi qarorni imzoladi.
Qarorga ko‘ra, ishlab chiqarilganiga 1 yildan oshmagan, dvigatel hajmi 1 200 sm kubdan yuqori bo‘lmagan yangi yengil avtotransport vositalari uchun (TN TIF kodi 8703 21 10, 8703 22 10 va 8703 31 10) 2026-yilga quyidagi bojxona boji stavkalari belgilanmoqda:
- 1 000 sm kubgacha — 0% (amalda — 15% + $0,4/kub sm);
- 1 000−1 200 sm kub — 5% (amalda — 15% + $0,6/kub sm).
Natijada dvigatel hajmi 1 000 sm kubgacha bo‘lgan avtomobillar uchun bojxona to‘lovlarining jami miqdori amaldagi 39−43% dan 19−23% gacha, dvigatel hajmi 1 000−1 200 sm kub bo‘lgan avtomobillar uchun esa 44−52% dan 30−36% gacha kamayadi.
Yangi qaror narxga qanday ta’sir qiladi?
Quyida dvigatel hajmi 1200 sm kubgacha bo‘lgan avtomobillar uchun bojxona stavkalarining kamaytirilishi, 1000 sm kubgacha bo‘lganlariga esa 0%ga tushirilishi narxlarga qanday ta’sir qilishi hisob-kitob qilingan.
Xususan, 1 000 sm kub hajmli avtomobil uchun bu toifaga kiruvchi bozor narxi $10 ming bo‘lgan avtomobil misolida qaralsa, quyidagi majburiy to‘lovlar mavjud:
| Avval | Hozir | Farq | |
| Bojxona boji | $1 900 (15% + $0,4/kub sm) | 0%ga tushirildi | $1 900 |
| QQS (12%) | $1 428 (bojxona boji qo‘shilgach hisoblangan) | $1 200 | $228 |
Shuningdek, utilizatsiya yig‘imi (bazaviy stavkaning 30 baravari) taxminan $846 (9 mln 900 ming so‘m)ni hamda bojxona yig‘imi (0,2%) taxminan $20 ni tashkil etadi.
Jami hisoblab chiqilsa, avvalgi narx $14 194 bo‘lgan bo‘lsa, hozirgi narx $12 066 bo‘ladi. O‘rtadagi farq esa 2 128 ni tashkil etadi.
Demak, dvigatel hajmi 1 000 sm kubgacha, narxi $10 ming bo‘lgan avtomobil uchun to‘lanadigan majburiy to‘lovlar taxminan $2 128 ga arzonlaydi.
Bu hisob-kitoblarda logistika narxi hisobga olinmagan.
