Sharqiy Yaqin Sharqdagi ziddiyat sabab Shri-Lanka mamlakatda qolib ketgan sayyohlar vizasini ikki haftaga uzaytiradi. Bu haqda Shri-Lanka hukumati xabar bermoqda.
Bu 2026-yil 28-fevralda AQSH, Isroil va Eron o‘rtasida boshlangan nizo sababli yuzaga kelgan aviaqatnovlardagi muammolar tufayli mamlakatdan ucha olmayotgan barcha sayyohlarning vizasi uzaytiriladi.
Viza muddatini uzaytirish avtomatik tarzda amalga oshiriladi, buning uchun hech narsa qilish kerak emas.
Ushbu muammo BAA, Qatar, Ummon va Bahrayn orqali amalga oshiriladigan tutash reyslarga ta’sir ko‘rsatdi. Bu davlatlar Osiyodan va Hind okeanidagi orollardan — Maldiv, Seyshel, Mavrikiy, Shri-Lanka, shuningdek, Indoneziya, Malayziya hamda Afrika mamlakatlaridan uchiladigan parvozlar uchun tranzit markazi sifatida foydalaniladi.
Mamlakat hukumati sayyohlar xavfsizligini ta’minlash maqsadida turli davlatlarning elchixonalari bilan hamkorlikni zudlik bilan yo‘lga qo‘yish rejasini ishlab chiqishni mahalliy Tashqi ishlar vazirligiga topshirdi.
Idora sayyohlarning o‘z uylariga qaytishi uchun Yaqin Sharq mamlakatlarini aylanib o‘tuvchi muqobil yo‘nalishlarni topish yuzasidan aviakompaniyalar bilan hamkorlik qiladi.
Shuningdek, Yaqin Sharq mamlakatlariga reyslar bekor bo‘lgani sabab Bali orolidan chiqishga ulgurmagan sayyohlarga Indoneziya hududida qo‘shimcha 30 kungacha qolish ruxsati beriladi. Bu haqda Denpasardagi Ngurah-Rai aeroporti immigratsiya xizmati RIA Novosti nashriga ma’lum qildi.
Xabarga ko‘ra, aviakompaniya reyslari bekor bo‘lgan yo‘lovchilar majburiy holatlar bo‘yicha qolish ruxsatnomasini (Izin Tinggal Keadaan Terpaksa, ITKT) olishlari mumkin — u 30 kungacha beriladi va keyinchalik uzaytirish imkoniyati mavjud. Hujjatni to‘g‘ridan-to‘g‘ri Ngurah-Rai xalqaro aeroportida yoki mahalliy immigratsiya bo‘limida rasmiylashtirish mumkin.
Ta’kidlanishicha, reyslar bekor bo‘lgani sababli yuzaga kelgan qolish muddatini oshirish (overstay) jarimalari olinmaydi.
Shu bilan birga, chet ellik fuqarolar aviakompaniya yoki aeroport ma’muriyati tomonidan reys bekor qilinganini yoki ko‘chirilganini tasdiqlovchi rasmiy hujjat taqdim etishlari kerak.
Bundan tashqari, allaqachon chiqish immigratsiya nazorati (exit clearance)dan o‘tgan, ammo majburan Indoneziya hududiga qaytishi kerak bo‘lgan sayyohlar hujjatlarini amaldagi qoidalarga muvofiq rasmiylashtiradi.
Avvalroq Shavkat Mirziyoyev Yaqin Sharqdagi holat sabab fuqarolarni evakuatsiya qilish bo‘yicha topshiriq bergani haqida xabar berilgandi.
Repatriatsion reyslar Saudiya Arabistoni, BAA, Qatarga parvozlarni amalga oshiruvchi aviakompaniyalar tomonidan tashkil etiladi.
