IIV Yo‘l harakati xavfsizligi xizmati skuter, elektroskuter va elektromototsikllar uchun ro‘yxatdan o‘tkazish raqami belgilarini berishni boshladi. Bu haqda vazirlik Telegram-kanalida ma’lum qilindi.
Yangi raqamlarning dastlabki namunalari aks etgan video Farg‘ona viloyati YHXB xodimlari tomonidan e’lon qilindi. Ularning ma’lumotiga ko‘ra, ro‘yxatga olish-imtihon bo‘limlarida belgilarni berish 26-dekabrdan boshlanadi.
Elektroskuterlar va elektromototsikllar uchun hududiy kod uchun maydonda yashil fonli raqamlar ajratiladi. Ichki yonuv dvigatelli skuterlarda bu maydon oq rangda bo‘ladi.
YHXBda ro‘yxatdan o‘tmagan moped va skuter egalari ro‘yxatdan o‘tkazish-imtihon bo‘limiga tashrif buyurishlari tavsiya etildi. Idora xodimi transport vositasini holatini ko‘rikdan o‘tkazadi, so‘ngra uni ro‘yxatga oladi.
Vazirlar Mahkamasi joriy yilning iyul oyida moped va skuterlar uchun raqamlarning tashqi ko‘rinishini tasdiqlagan edi.
Ichki ishlar vazirligi va Texnik jihatdan tartibga solish agentligi uch oy ichida ular uchun texnik reglamentlarni belgilashi va 2025-yil 1-yanvardan ro‘yxatdan o‘tmagan mopedlarda haydash taqiqlanishi kerak edi.
23-dekabr kuni Ichki ishlar vaziri Po‘lat Bobojonov mototransport, shuningdek, tirkama va yarim tirkamalar uchun raqamlar berish uchun yig‘imni kamaytirish to‘g‘risida buyruq berdi. Yangi summa 1,5 BHM (562 500 so‘m)ni tashkil etadi.
Avvalroq “Spot” Buxoroning tarixiy qismida skuter va mopedlarda harakatlanish cheklangani haqida yozgandi.
Bu yechim mazkur transport vositalarining tarixiy merosga zarar yetkazishi hamda hududda harakatlanayotgan aholi va sayyohlarga xavf tug‘dirishi mumkinligi sabab qabul qilingan.
