O‘zbekistondagi to‘lov ilovalari oddiy to‘lov va o‘tkazmalardan tashqari, qo‘shimcha imkoniyatlarga ega obunalar evaziga bepul o‘tkazmalar, keshbek, karta monitoringi, striming xizmatlari va bank mahsulotlari bo‘yicha imtiyozlarni ham taklif etmoqda.
Bunday obunalar narxi bir necha ming so‘mdan 100 ming so‘mgacha bo‘lib, ular komissiyalarni kamaytirish, sodiqlik dasturlari va turli bonuslarni taklif etadi.
Spot O‘zbekistondagi mashhur to‘lov ilovalari va bank xizmatlaridagi obuna shartlarini, ular qancha turishi hamda foydalanuvchilar qanday imkoniyatlarga ega bo‘lishi haqida o‘rgandi.
Click
Obuna narxi: oyiga 9 999 so‘mdan boshlanadi.
Click to‘rtta obuna variantini taklif etadi — Smart, Comfort, Pro va Elite. Ularning barchasi bir xil sxema bo‘yicha ishlaydi: foydalanuvchi oyiga belgilangan summani to‘laydi va komissiyasiz pul o‘tkazmalari limitini, shuningdek, tarifga qarab qo‘shimcha bonuslarni oladi.
Eng arzon tarif — Smart, oyiga 9 999 so‘m. U pul o‘tkazmalaridan vaqti-vaqti bilan foydalanadiganlar uchun mos keladi: obuna bo‘yicha oyiga 1,5 mln so‘mgacha mablag‘ni bepul jo‘natish mumkin. Qo‘shimcha tarzda foydalanuvchilarga ustuvor qo‘llab-quvvatlash xizmati va ilovaning oltin rangli dizayni taqdim etiladi.
Pulni tez-tez o‘tkazib turadiganlar uchun esa Click Comfort tarifini taklif qiladi. Uning narxi oyiga 39 999 so‘mni tashkil etadi (aksiya bo‘yicha — 33 999 so‘m). Komissiyasiz o‘tkazmalar limiti oyiga 5 mln so‘mgacha oshiriladi va u bilan birga kartalarni kuzatish hamda xizmat orqali barcha to‘lovlar uchun 0,3% keshbek olish imkoniyati paydo bo‘ladi.
Shuningdek, oyiga 69 999 so‘m (yoki aksiya bo‘yicha 59 499 so‘m) evaziga Pro paketi ham mavjud. Ushbu tarifning shartlari avvalgisiga o‘xshash, biroq unda foydalanuvchi 8 mln so‘mgacha bo‘lgan pul o‘tkazmalarini komissiyasiz amalga oshirishi mumkin.
Eng qimmat tarif — Elite. Uning standart narxi oyiga 111 111 so‘mni tashkil etadi, ammo e’lon qilingan vaqtda obuna 77 777 so‘mga rasmiylashtirilishi mumkin. Bu yerda pul o‘tkazmalari limiti oyiga 15 mln so‘mga yetadi. Bundan tashqari, foydalanuvchilarga QR-kodlar va terminallar orqali to‘lovlar uchun 2% keshbek, shuningdek, kommunal to‘lovlar uchun 1% keshbek beriladi.
Bunda Visa Sum va Mastercard Sum kartalariga pul o‘tkazmalari imtiyozli limitlarga kirmaydi va alohida to‘lanadi. Obuna doirasida amalga oshirilgan pul o‘tkazmalari uchun keshbek berilmaydi.
Obunani bevosita Click ilovasida, shaxsiy kabinetdagi obunalar bo‘limiga o‘tib rasmiylashtirish mumkin. Shuningdek, xizmat promokod orqali tarifni faollashtirish imkonini beradi. Agar obuna muddati tugagandan so‘ng avtomatik yangilash faolsizlantirilmasa, obuna pulli asosda davom etadi.
Payme
Obuna narxi: oyiga 9 990 so‘mdan boshlanadi.
Payme Plus bir nechta xizmatlarni bitta obunaga birlashtiradi. 2026-yil iyun oyidan boshlab foydalanuvchilar uchun ikkita tarif mavjud — Monitoring va Hammasi kiritilgan. Ilgari liniyada Bazaviy tarifi mavjud edi, biroq kompaniya undan voz kechdi va barcha foydalanuvchilarni avtomatik ravishda Monitoring tarifiga o‘tkazdi.
Obunani to‘g‘ridan-to‘g‘ri ilovada ulash mumkin: buning uchun profilni ochib, obunalar bo‘limiga o‘ting, mos tarifni tanlang va to‘lovni amalga oshiring.
Eng arzon tarif — Monitoring oyiga 9 990 so‘mga. Unga kartalarni monitoring qilish xizmati, Yandex Plus obunasi va Keyinroq to‘lash xizmati bo‘yicha oshirilgan limit kiradi.
Aslida, bu shaxsiy moliyani nazorat qilish uchun vositalar to‘plamidir. Foydalanuvchi karta bo‘yicha barcha operatsiyalarni ko‘rishi, xarajatlar va tushumlarni kuzatishi, statistikani ko‘rishi va zarur bo‘lsa, kartani bloklashi mumkin. Bu yerda ulangan kartalar bo‘yicha mablag‘lar harakati ham ko‘rsatiladi.
Hammasi kiritilgan tarifi oyiga 39 990 so‘mni tashkil etadi (dastlabki 30 kun 9 990 so‘m) va Monitoring imkoniyatlaridan tashqari qo‘shimcha xizmatlar va sodiqlik dasturlaridan foydalanish imkonini beradi. Masalan, foydalanuvchilar Uzcard va Humo kartalari o‘rtasida oyiga 5 million so‘mgacha bepul o‘tkazmalarni amalga oshirishlari mumkin.
Ushbu tarifga Keyinroq to‘lash xizmati, Yandeks Plus va Setanta Sports obunalari, shuningdek, ilovadagi tovarlar va xizmatlar uchun to‘lovlarda 1% keshbek bilan sodiqlik dasturi ham kiradi.
Muhim: olingan keshbekni kartaga yechib olish yoki naqd pulga aylantirish mumkin emas, uning maksimal miqdori 200 ming so‘mni tashkil etadi. U ilova ichidagi maxsus hisobda saqlanadi va tovarlar hamda xizmatlar uchun to‘lovlar uchun ishlatiladi.
Ikkala tarif foydalanuvchilari uchun firibgarlikka qarshi yordam dasturi amal qiladi. U maslahat yordami, murojaatlarni tezkor ko‘rib chiqish va firibgarlik fakti tasdiqlansa, moddiy yordam olish imkoniyatini o‘z ichiga oladi. Bunday qo‘llab-quvvatlashning maksimal miqdori yiliga 5 mln so‘mni tashkil etadi.
Shuningdek, yaqinda TBC UZ ilovasida buyurtma berish mumkin bo‘lgan TBC Salom kartasidan foizsiz cheksiz pul o‘tkazmalari qo‘shildi.
TBC Bank
Obuna narxi: oyiga 29 999 so‘m.
TBC Plus — TBC UZ ilovasi ichidagi oylik 29 999 so‘mlik obuna. U bank ekotizimining moliyaviy vositalar, keshbek dasturi va hamkorlik takliflari kabi bir nechta xizmatlarini o‘zida birlashtiradi.
Obunani ilova orqali rasmiylashtirish mumkin: buning uchun profilga o‘tib, tegishli bo‘limni tanlash kerak. Obuna yoqilgach, foydalanuvchi xizmatni o‘chirib qo‘ymagunicha mablag‘lar har oy avtomatik tarzda yechib olinadi.
Obunaning asosiy bonuslaridan biri — TBC Salom egalari uchun taqdim etiladigan keshbekdir. Foydalanuvchilar bank kartasi bilan to‘langan xaridlar uchun 1% keshbek oladi, hisoblanadigan maksimal summa esa oyiga 500 ming so‘mgacha yetishi mumkin.
Shuningdek, obuna “Hisob-Kitob” moliyaviy yordamchisining kengaytirilgan versiyasidan foydalanish imkonini ham beradi. Uning yordamida barcha kartalar bo‘yicha operatsiyalar tarixini to‘liq ko‘rish, kirim-chiqimlarni batafsil tahlil qilish hamda shaxsiy budjetni rejalashtirish mumkin.
Bundan tashqari, paketga Yandex ekotizimi xizmatlaridan, jumladan, onlayn kinoteatr, musiqa xizmati va boshqa raqamli mahsulotlardan foydalanish imkonini beruvchi Yandex Plus obunasi kiradi.
Shuningdek, obuna foydalanuvchilari haftada bir marta Safia tarmog‘ida bepul qahva olish imkoniyatiga ega.
Paynet
Narxi: oyiga 4 999 so‘m.
Paynet pulli xizmat va ichki bonuslar tizimini o‘zida mujassamlashtirgan. Asosiy pulli xizmat — bu oyiga 4 999 so‘m evaziga kartalar monitoringini yuritishdir.
U barcha operatsiyalar haqida bildirishnomalarni qabul qilish hamda ilova orqali bank kartalaridagi mablag‘lar harakatini kuzatib borish imkonini beradi. Monitoringni ilova ichidagi “Tarix” bo‘limida ulash mumkin.
Bundan tashqari, ilovada tovarlar va xizmatlar uchun to‘lovlar uchun hisoblanadigan bonus “tangalar” tizimi mavjud. Foydalanuvchi har bir sarflangan ming so‘m uchun bitta tanga oladi. Kartalar o‘rtasidagi pul o‘tkazmalari va chiptalar sotib olish bundan mustasno.
Ushbu xizmatni ilovaning bosh ekranida ulash mumkin, buning uchun alohida vidjet mavjud. Faollashtirilgandan so‘ng, foydalanuvchiga Uzcard va Humo kartalari o‘rtasida oyiga 3 mln so‘mgacha bepul o‘tkazish imkonini beruvchi Transfer bazaviy paketi taqdim etiladi.
Tangachalarni yig‘ib, bu limitni oshirish mumkin. Buning uchun ikkita to‘plam mavjud: 250 tangachaga Plus va 500 tangachaga Pro. Birinchisi bepul o‘tkazmalar limitini 1 mln so‘mga, ikkinchisi esa 2 mln so‘mga oshiradi. Shunday qilib, komissiyasiz o‘tkazmalarning umumiy limiti oyiga 6 mln so‘mgacha yetishi mumkin.
Tangachalarni, shuningdek, promokodlar va hamkorlarning maxsus takliflariga almashtirish ham mumkin. Ular orasida Yandex, TVCOM, ITV va boshqa servislar bor.
Uzum Bank
Obuna narxi: oyiga 99 990 so‘m.
2026-yil 1-iyundan boshlab Uzum Bank Visa Uzum karta egalari uchun obunani ishga tushirdi. Agar bank kartasi hali mavjud bo‘lmasa, uni to‘g‘ridan-to‘g‘ri ilovada rasmiylashtirish mumkin — tegishli bo‘lim asosiy ekranda joylashgan.
Obuna Uzum ekotizimi doirasida qo‘shimcha imtiyoz va bonuslardan foydalanish imkonini beradi. Ularni ikki yo‘l bilan olish mumkin.
Birinchisi — pulli obunani rasmiylashtirish. Uning narxi oyiga 99 990 so‘mni tashkil qiladi, biroq 2026-yil 31-avgustgacha 59 990 so‘mlik aksiya narxi amal qiladi.
Ikkinchisi — kundalik xaridlar uchun Uzum kartasidan foydalanish. Agar bir oy davomida karta orqali 500 ming so‘mdan ortiq xarajat qilinsa, keyingi oy uchun imtiyozlardan foydalanish avtomatik tarzda va qo‘shimcha to‘lovsiz uzaytiriladi. Uni keyinchalik ham saqlab qolish uchun bu shartni har oy bajarib turish kerak.
Imtiyozlar qatoriga Uzcard va Humo kartalariga oyiga 2 mln so‘mgacha komissiyasiz pul o‘tkazish imkoniyati kiradi. Limitdan oshgach, 0,2% miqdorida pasaytirilgan komissiya amal qiladi.
Shuningdek, foydalanuvchilar boshqa banklarning bankomatlaridan komissiya qaytarilishi sharti bilan naqd pul yechib olishlari mumkin. Bunday operatsiyalar uchun limit oyiga 2 mln so‘mni tashkil etadi.
Uzum Market’da alohida bonus amal qiladi: imtiyozlar faollashtirilgach, foydalanuvchiga oy davomidagi birinchi, oldindan to‘lov qilingan buyurtma qiymatining 100% i, biroq 50 ming so‘mdan ko‘p bo‘lmagan miqdorda qaytariladi.
Bundan tashqari, obuna Uzum Bank ilovasi orqali mobil aloqa va internet to‘lovlari uchun keshbek hamda jamoat transportidan foydalanish uchun imtiyozli shartlarni taqdim etadi. Keshbek hisoblangandan so‘ng bir martalik qatnov narxi 800 so‘mni tashkil etadi. Taklif O‘zbekistonning bir qator shaharlaridagi metro va avtobuslarda yurish uchun amal qiladi.
