Ko‘chmas mulk va transport vositalari bo‘yicha bitimlar soni may oyiga nisbatan 18,5% ga ko‘p. Markaziy bank ma‘lumotlariga ko‘ra, bu yangi hisob-kitob tartibi joriy etilganidan beri qayd etilgan eng yuqori ko‘rsatkichdir.
Ulardan 15 146 tasi (44,1%) ko‘chmas mulkka, 19 241 tasi (55,9%) esa transport vositalariga to‘g‘ri keldi. Yana 834 ta bitim ko‘rib chiqilmoqda.
Eskrou hisobvaraqlari orqali hisob-kitob qilishning yangi tartibi 2026-yil 1-apreldan amal qiladi. Ulushli qurilishdagi eskroudan farqli o‘laroq, u qurilayotgan uy-joyni moliyalashtirish uchun emas, balki xaridor va sotuvchi o‘rtasidagi oldi-sotdi bitimini xavfsiz yakunlash uchun qo‘llaniladi. Ushbu mexanizm ishga tushirilishining birinchi haftasidayoq u orqali 6 156 ta bitim rasmiylashtirilgan.
Aprel-iyun oylarida eskrou hisobvaraqlari orqali jami 95,2 mingta bitim rasmiylashtirildi. Aprel oyida 31,7 mingta, may oyida esa 29 mingta operatsiya amalga oshirilgan bo‘lib, bu o‘tgan oyga nisbatan 8,6% ga kamdir.
2026-yilning birinchi choragida O‘zbekistonda 110,1 mingta ko‘chmas mulk oldi-sotdi bitimi ro‘yxatga olingan. Markaziy bank mart oyidagi keskin o‘sishni, jumladan, bozor ishtirokchilarining eskrou tizimi kuchga kirgunga qadar shartnomalarni rasmiylashtirishga intilgani bilan izohlagan edi. Taqqoslash uchun, ikkinchi chorakda eskrou hisobvaraqlari orqali 40,4 mingta ko‘chmas mulk bitimi amalga oshirildi. Iyundagi operatsiyalar o‘sishi dastlabki noaniqlik davri yangi hisob-kitob tartibi doirasida faollikning tiklanishi bilan almashayotganidan dalolat berishi mumkin.
Bitimlar soni bo‘yicha Toshkent shahri yetakchilikni saqlab qolmoqda. Aprel-iyun oylarida poytaxt hissasi qariyb 28,5% ni — 27,1 mingta rasmiylashtirilgan bitimni tashkil etdi. Keyingi o‘rinlarni Farg‘ona, Samarqand va Andijon viloyatlari egallab turibdi.
Bu hududlar Toshkent shahri bilan birgalikda operatsiyalarning asosiy hajmini shakllantirmoqda: uch oy davomida barcha bitimlarning qariyb 54,7%i ularning hissasiga to‘g‘ri keldi. Hududiy tarkib umuman olganda bozorning avvalgi konsentratsiyasiga mos keladi: operatsiyalarning eng katta hajmi Toshkent shahriga hamda ishbilarmonlik va iste‘mol faolligi yuqori bo‘lgan yirik viloyatlarga to‘g‘ri kelmoqda.
Yana bir ko‘rsatkich — ko‘rib chiqilayotgan bitimlar sonining kamayishidir. Aprel oyida ularning soni 1 516 ta, mayda 1 113 ta, iyunda esa 834 tani tashkil etgan. Markaziy bank statistikasida aks etgan bitimlarning umumiy sonida ularning ulushi 4,6% dan 2,4% gacha kamaydi.
Iyun oyida operatsiyalarning umumiy soni o‘sgani fonida ushbu ko‘rsatkichning pasayishi muhim ahamiyatga ega: tizim tugallanmagan arizalarni to‘plab qo‘ymasdan, ko‘proq bitimlarga ishlov berdi.
Spot, avvalroq, O‘zbekistonda maqsadli ipoteka omonati ishga tushirilgani haqida yozgandi.
