Auksion savdolarida boshlang‘ich narxi 1 so‘mga teng 25 ta davlat mulki obyekti sotildi

Joriy yilning 22−26 aprel kunlari “E-ijro auksion” elektron onlayn-auksion savdolarda boshlang‘ich bahosi 1 so‘mga teng qiymatdagi 25 ta bo‘sh turgan davlat mulki obyekti sotildi. Bu haqda Davlat aktivlarini boshqarish agentligi xabar berdi.

Masalan, Andijon shahri, Ahmadbekhoji ko‘chasi 78-uydagi binoning 474,44 kv.metrga teng bo‘lgan qurilish osti maydoni 291 mln. so‘mga sotildi. Auksion g‘olibi 1,5 yil ichida 200 mln. so‘m investitsiya kiritish hamda 15 ta ish o‘rni yaratish majburiyatini qabul qildi.

Xorazm viloyati, Bog‘ot tumani, Beshariq qishlog‘i “Nurli maskan” mahallasida joylashgan, umumiy yer maydoni 0,076 gektarga teng bo‘lgan va 45 mln. so‘mga sotilgan bino bo‘yicha auksion g‘olibi 6 oy ichida 800 mln. so‘m investitsiya kiritish hamda 12 ta ish o‘rni yaratish majburiyatini oldi.

Hozirgacha 598 ta bo‘sh turgan davlat mulki obyekti boshlang‘ich bahosi 1 so‘mga teng qiymatda 374 mlrd. 544 mln. so‘mlik investitsiya kiritish hamda 6840 dan ortiq yangi ish o‘rni yaratish sharti bilan auksion savdolariga chiqarilgan bo‘lib, shundan 456 ta bo‘sh turgan davlat mulki ob’ekti 282 mlrd. 741 mln. so‘m investitsiya kiritish va 5001 ta yangi ish joyi ochish sharti bilan 15 mlrd. 930 mln. so‘mga sotilgan.

Endilikda 142 ta bo‘sh turgan davlat mulki obyekti “E-ijro auksion” yagona elektron savdo maydonchasida savdoda turibdi. Ularga 91 mlrd. 803 mln. so‘mlik investitsiya jalb qilish, 1846 ta yangi ish o‘rni barpo etish ko‘zda tutilgan.