“TikTok” ijtimoiy tarmog‘i 15 daqiqa davom etadigan videolarni yuklash imkoniyatini sinovdan o‘tkazmoqda. Bu haqda “TechCrunch” kompaniya vakillariga tayanib xabar berdi.
Platforma ayrim hududlarda cheklangan foydalanuvchilar guruhi bilan yangilanishlarni sinovdan o‘tkazayotganini tasdiqladi, ammo tafsilotlarni oshkor qilmadi.
Yangilik ilovadagi maksimal video uzunligini 10 daqiqadan 15 daqiqagacha oshirish imkonini beradi.
Ijtimoiy tarmoq mutaxassisi Mett Navarra birinchi navbatda yangi funksiya haqida gapirdi. Uning skrinshoti shuni ko‘rsatadiki, “TikTok” foydalanuvchilari mobil ilova yoki saytning veb-versiyasi orqali uzunroq videolarni yuklashlari mumkin.
Ilgari, agar video 10 daqiqadan uzoqroq bo‘lsa, ijodkorlar tomoshabinlarni videoning keyingi qismiga yo‘naltirishi kerak edi.
“TikTok” qisqa videolar tufayli mashhurlikka erishdi. 2023-yil fevral oyida kompaniya videolarning maksimal uzunligini 3 daqiqadan 10 daqiqagacha oshirdi. Ilgari videoning maksimal uzunligi 60 soniya edi.
Platforma odatda “YouTube"da kontent joylashtirgan uzoq shaklli video yaratuvchilarni jalb qilishga qaratilgan.
Ilgari videoxosting saytida “YouTube Shorts” qisqa videolar bo‘limi ochilgan edi. O‘z navbatida, “TikTok” gorizontal to‘liq ekran rejimini joriy qildi.
Avvalroq “Spot” O‘zbekistonda bloklangan TikTok soliq to‘lovchi sifatida ro‘yxatdan o‘tgani haqida yozgandi.
Endilikda Tiktok uchun xizmatlarga 12% QQS hisoblanadi.
2021-yilning yozida “Twitter”, “Skype”, “WeChat” va “VKontakte” tarmoqlari qatorida “TikTok"ga ham cheklov qo‘yilgandi. Bunga mazkur tarmoqlar o‘zbekistonliklarning shaxsiga oid ma’lumotlarni mamlakat hududida joylashgan serverlarda saqlamayotgani sabab bo‘ldi.
O‘sha yilning dekabrida, Komil Allamjonov mazkur platformalar faoliyatini cheklash emas, ular bilan yaqin muloqotga kirishish barcha uchun manfaatli bo‘lishi haqida fikr birdirdi.
2022-yilning iyuniga kelib, O‘zbekistonda “Twitter”, “TikTok” va “VKontakte” ijtimoiy tarmoqlari blokdan chiqarilishi kutilayotgani ma’lum bo‘ldi.
Natijada, avgust oyida “Twitter”, “WeChat” hamda “ВКонтакте” ilovalari blokdan yechildi, biroq, “TikTok"ni ham blokdan chiqarish bo‘yicha muzokaralar davom etdi.
