“Samsung” o‘zining aqlli soatlarida glyukoza darajasini o‘lchash funksiyasini joriy etishga tayyorlanmoqda. Bu haqda “Android Authority” nashri xabar berdi.
Ushbu texnologiya qondagi qand miqdorini invaziv usullarsiz — yorug‘lik yordamida ma’lumotlarni tahlil qiladigan optik sensorlar orqali kuzatish imkonini beradi.
Agar kompaniya muvaffaqiyatga erishsa, bu diabet bilan og‘rigan millionlab odamlarning hayotini sezilarli darajada osonlashtiradi va ularni muntazam ravishda terini teshish zaruratidan xalos qiladi.
“Biz noinvaziv optik uzluksiz glyukoza monitori ustida ishlayapmiz. Men sizga aniq [ishga tushirish] vaqtini ayta olmayman, lekin biz erishayotgan yutuqlardan juda ruhlanaman “, — dedi kompaniya katta vitse-prezidenti Xon Pak.
Ishlab chiqish optik sensorlarga asoslangan bo‘lib, ular allaqachon aqlli soatlarda qondagi puls va kislorod darajasini o‘lchash uchun ishlatiladi. Bu qurilmalar qaytgan yoki yutilgan yorug‘lik to‘lqinlarini tahlil qilish prinsipi bo‘yicha ishlaydi.
“Samsung"ning yangi yondashuvi tana to‘qimalarida glyukoza darajasini aniqlash uchun shunga o‘xshash usuldan foydalanishni o‘z ichiga oladi. Kompaniya bunday o‘lchovlarning aniqligi tibbiy standartlarga mos kelishiga intiladi.
Avvalroq “Spot” yangi “Apple Watch Series 10” qon bosimini o‘lchash imkoniyatiga ega bo‘lishi haqida yozgandi.
Funksiya qon bosimi ko‘rsatkichini uchinchi tomon qurilmalaridan foydalanmasdan kuzatish imkonini beradi.
